واشنگٹن: امریکی صدر ڈونلڈ ٹرمپ نے سفری پابندیوں کے منصوبے پر زیادہ سخت عمل کی ضرورت پر زور دیتے ہوئے کہا ہے کہ سپریم کورٹ کو اس معاملے پر سماعت جلد از جلد نمٹانی چاہیے۔
ٹرمپ نے علی الصبح اپنی ٹوئیٹس میں مزید کہا کہ سلامتی کی وجوہات کے باعث امریکا پہلے ہی ملک کے اندر آنے والے مسافروں کی ’’انتہائی سخت جانچ پڑتال‘‘ کر رہا ہے۔ ٹرمپ کا اپنے ٹوئیٹر پیغامات میں یہ بھی کہنا تھا کہ ’’عدالتیں سست اور سیاسی ہیں‘‘۔
اس سے قبل وائٹ ہاؤس نے امریکی سپریم کورٹ سے کہا تھا کہ وہ صدر ٹرمپ کے مسلمان ملکوں پر عائد سفری پابندیوں کے قانون کو بحال کر دے۔ یہ قانون نچلی عدالتوں نے یہ کہہ کر معطل کر دیا تھا کہ یہ متعصبانہ ہے۔ حکومت نے سپریم کورٹ کے نو ججوں سے دو ہنگامی درخواستیں عائد کر کے اپیل کی ہے کہ نچلی عدالتوں کے فیصلے کو منسوخ کیا جا سکے۔
وزارتِ انصاف کی ترجمان سارا فلوریس نے کہا ہم نے سپریم کورٹ سے کہا ہے کہ وہ اس اہم کیس کی سماعت کرے اور ہمیں اعتماد ہے کہ صدر ٹرمپ کا انتظامی حکم نامہ ان کے ملک کو محفوظ بنانے اور دہشت گردی سے محفوظ رکھنے کے قانونی دائر اختیار کے اندر ہے۔
انھوں نے کہا صدر پابند نہیں ہیں کہ وہ ایسے ملکوں سے لوگوں کو آنے کی اجازت دیں جو دہشت گردی کی پشت پناہی کرتے ہیں تاوقت یہ کہ وہ اس بات کا تعین کر سکیں کہ ان لوگوں کی مناسب چھان بین ہو اور وہ امریکی سلامتی کے خطرہ نہ بن سکیں۔
جنوری میں صدر ٹرمپ کا حکم نامہ ابتدائی طور پر ریاست واشنگٹن اور منی سوٹا میں منسوخ کر دیا گیا تھا۔ اس کے بعد انھوں نے مارچ میں ایک ترمیم شدہ حکم نامہ جاری کیا جس میں صومالیہ، ایران، شام، سوڈان، لیبیا اور یمن سے لوگوں کا داخلہ ممنوع قرار پایا تھا۔ اس کے علاوہ تمام پناہ گزینوں کا داخلہ بھی عارضی طور پر معطل کر دیا گیا تھا۔ تاہم میری لینڈ کے ایک ڈسٹرکٹ جج نے یہ کہہ کر اسے بھی عارضی طور پر معطل کر دیا کہ یہ قانون آئینی حقوق کے منافی ہے۔
ریاست ہوائی کے ایک جج نے بھی کہا کہ قانون متعصبانہ ہے اور کہا کہ حکومت کے پاس اس بات کے شواہد نہیں ہیں کہ یہ قومی سلامتی کا معاملہ ہے۔ گذشتہ ماہ ورجینیا کی ایک عدالت نے بھی حکم نامے کی معطلی ختم کرنے کا فیصلہ کیا تھا۔ اس نے کہا تھا کہ حکومت کا قومی سلامتی کی دلیل دراصل حکم نامے کی جڑیں مذہبی منافرت میں ہیں اور اس کا مقصد مسلمانوں کو ملک میں داخل ہونے سے روکنے کی کوشش ہے۔ وزارتِ انصاف کا کہنا ہے کہ وہ چاہتی ہے کہ سپریم کورٹ ان سارے احکامات کا جائزہ لے۔
نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں
