مسٹر بین کی موت کی جھوٹی خبر سوشل میڈیا پر وائرل ہونے سے ان کے مداح سخت صدمے کا شکار ہوگئے

ممبئی: برطانیہ کے مشہور مزاحیہ اداکار رووان ایٹکنسن المعروف مسٹر بین کی موت کی جھوٹی خبر سوشل میڈیا پر وائرل ہونے سے ان کے مداح سخت صدمے کا شکار ہوگئے۔

62 سالہ برطانوی مزاحیہ اداکار رووان ایٹکنسن اپنے کردار ’’ مسٹر بین ‘‘ کی بدولت دنیا بھر میں مشہور ہیں اور بچے بڑے سب ہی ان کی منفرد اداکاری کے دیوانے ہیں یہی وجہ ہے کہ جیسے ہی ان کی موت کی جھوٹی خبر انٹرنیٹ پر وائرل ہوئی ان کے مداح سخت پریشانی کا شکار ہوگئے۔

یہ پہلی بار نہیں کہ کسی مشہور شخصیت کی موت کی افواہ سوشل میڈیا پر وائرل ہوئی ہو بلکہ اس سے قبل بالی ووڈ کے سپر اسٹار امیتابھ بچن، شاہ رخ خان، جانی ڈیپ، ملی سائرس، قادر خان اور شوئیتا تیواری کے مرنے کی افواہیں بھی سوشل میڈیا پر وائرل ہوچکی ہیں۔

امریکی نشریاتی ادارے فاکس نیوز نے گزشتہ روز جیسے ہی مسٹر بین کے کار حادثے میں ہلاکت کی خبر نشر   کی یہ خبر جنگل کی آگ کی طرح پھیل گئی اور لوگ سخت پریشانی کے عالم میں فون کرکے اپنے پسندیدہ اداکار کے بارے میں معلومات حاصل کرنے لگے۔

بعد میں یہ واضح ہونے کے بعد یہ خبر سچ نہیں بلکہ افواہ ہے اور روان ایٹکنسن زندہ اور صحیح سلامت ہیں، لوگوں کی جان میں جان آئی تاہم سچ جاننے کے بعد لوگوں نے اس غلط خبر پر اظہار برہمی کی ہے۔

واضح رہے کہ مسٹر بین کے مرنے کی افواہ اس سے قبل 8 بار وائرل ہوچکی ہے اور یہ نویں بار ہے۔

مصنف کے بارے میں