ہنڈا موٹر سائیکل کی فروخت میں 17.63 فیصد کا اضافہ

لاہور: رواں مالی سال 2016-17ءکے پہلے 8 ماہ کے دوران ہنڈا موٹر سائیکل کی فروخت میں 17.63 فیصد کا اضافہ ہوا ہے اور جولائی تا فروری 2016-17ءکے دوران 6 لاکھ 26 ہزار 40 ہنڈا موٹر سائیکلیں فروخت کی گئیں۔
اٹلس ہنڈا لمٹیڈ کی رپورٹ کے مطابق گزشتہ مالی سال کے مقابلہ میں جاری مالی سال کے دوران ہنڈا موٹر سائیکلوں کی فروخت میں 93 ہزار 857 یونٹس کا اضافہ ریکارڈ کیا گیا ہے۔ رپورٹ کے مطابق گزشتہ مالی سال 2015-16ء کے دوران کمپنی کے تیار کردہ 8 لاکھ 11 ہزار 34 موٹر سائیکلز فروخت کئے گئے تھے جبکہ اس سے گزشتہ مالی سال 2014-15ءکے دوران کمپنی کے تیار کردہ موٹر سائیکلوں کی فروخت کا حجم 6 لاکھ 53 ہزار 193 یونٹس رہا تھا۔ کمپنی کی رپورٹ کے مطابق رواں مالی سال میں جنوری 2017ءکے دوران کمپنی نے 86 ہزار 100 موٹر سائیکلز تیار جبکہ 86 ہزار 74 موٹر سائیکلز فروخت کئے ہیں۔