اسلام آباد:امریکی صدر ڈونلڈ ٹرمپ کے ٹویٹ کے خلاف بلاو ل بھٹو نے آواز بلند کر دی ۔ بلاول نے سماجی رابطوں کی ویب سائٹ ٹوئٹر پر امریکی صدر ڈونلڈ ٹرمپ کو شدید تنقید کا نشانہ بنایا ہے۔
امریکی صدر ڈونلڈ ٹرمپ نے واشنگٹن میں رونالڈ ریگن عمارت سے خطاب کے دوران کہا کہ ہم نے پاکستان پر واضح کردیا ہے کہ جب ہم مسلسل شراکت داری قائم رکھنا چاہتے ہیں تو ہم ان کے ملک میں کام کرنے والے دہشت گرد گروہوں کے خلاف فیصلہ کن کارروائی دیکھنا چاہیں گے کیونکہ ہم ہر سال پاکستان کو بڑے پیمانے پر ادائیگی کرتے ہیں۔
امریکی صدر ڈونلڈ ٹرمپ نے مزید یہ بھی کہا کہ پاکستان کو 33 ارب ڈالر کی امداد دے کرامریکہ نے سب سے بڑی غلطی کی ہے ۔
امریکی صدر ڈونلڈ ٹرمپ کے ٹویٹ پر بلاول بھٹو نے شدید ردعمل کا اظہار کرتے ہوئے کہا ہے کہ پاکستان کوکسی ڈکٹیشن کی ضرورت نہیں!! اور ملکی مفاد میں انتہا پسندی کا خاتمہ کریں گے ۔
پیپلزپارٹی کے سربراہ کا کہنا ہے کہ امریکہ افغانستان میں اپنی ناکامی پر پاکستان کو قربانی کا بکرا بنانا چاہتا ہے ۔
جبکہ اپوزیشن لیڈر خورشید شاہ مل بیٹھ کر مسئلے کا حل نکالنے پر زور دے رہے ہیں،،ان کا کہنا ہے امریکی دھمکیوں پر پارلیمنٹ کا مشترکہ اجلاس بلایا جائے اور معاملے کا حل نکالا جائے۔