ڈراؤنے خواب دیکھنے والا شخص ذہنی امراض کا شکار ہوسکتا ہے، تحقیق

لندن: نیندمیں ڈراؤنے خواب آنا معمولی بات ہے جس کا بظاہر کوئی نقصان نہیں ۔لیکن اگر کسی شخص کو بار بار ایسے تجربے کا سامنا ہو تو یہ سنگین ذہنی امراض کا شکار ہو سکتا ہے۔
جی ہاں فن لینڈ کی ٹیورکو یونیورسٹی کی تحقیق میں بتایا گیا کہ نیند کے دوران نظر آنے والے یہ خوفناک خواب ذہنی امراض کی ابتدائی علامت ہوتے ہیں۔تحقیق کے مطابق اس طرح کے خوابوں کو سنجیدگی سے لیا جانا چاہیئے اور اس حوالے سے ڈاکٹر سے رجوع کرنا چاہیئے۔اس تحقیق کے دوران 1972 سے 2012 کے دوران 71 ہزار سے زائد افراد میں کیے جانے والے ایک سروے کے ڈیٹا کا جائزہ لیا گیا۔
نتائج سے معلوم ہوا کہ ایسے خواب زیادہ دیکھنے والے افراد میں مختلف ذہنی امراض کی نشاندہی ہوتی ہے۔محققین نے ایسے خوابوں کو منفی جذباتی حالت کی نشانی قرار دیا، جس کے نتیجے میں مزاج برہم رہنے سمیت دیگر ذہنی عوارض کا خطرہ بڑھتا ہے۔ان کا کہنا تھا کہ مستقبل میں اس حوالے سے مریضوں کی حالت میں بہتری لانے کے لیے زیادہ توجہ دینے کی ضرورت ہوگی کیونکہ یہ سنگین مسائل کی ابتدائی نشانی ہے۔