پشاور: جماعت اسلامی کی خیبرپختونخوا حکومت سے علیحدگی کے اعلان کے بعد اس کے وزرا اور پارلیمانی سیکرٹری عہدوں سے مستعفی ہوگئے۔
جمعرات کو دینی جماعتوں کے اتحاد متحدہ مجلس عمل کی بحالی کے بعد امیر جماعت اسلامی سراج الحق نے خیبرپختونخوا حکومت سے علیحدگی اختیار کرنے کا اعلان کیا تھا۔ وزیراعلی خیبرپختونخوا پرویز خٹک نے سراج الحق سے ملاقات کرکے حکومت نہ چھوڑنے کی درخواست کی تھی۔ پشاور میں وزیراعلیٰ خیبرپختونخوا پرویز خٹک کے ہمراہ پریس کانفرنس کرتے ہوئے جماعت اسلامی کے رہنما اور صوبائی وزیر بلدیات عنایت اللہ نے کہا کہ آج تاریخی دن ہے، اچھی شراکت اقتدار کے بعد الگ ہو رہے ہیں، دوستانہ ماحول میں علیحدگی اختیار کرکے اچھی سیاسی روایت قائم کی ہے۔ انہوں نے کہا کہ وزیراعلیٰ کے مشکور ہیں کہ انہوں نے بھرپور تعاون کیا، میرٹ کا قیام ہمارا مشترکہ ایجنڈا تھا، عوامی مفاد سب سے مقدم ہے، عوامی مفاد کے لیے آئندہ بھی ایک دوسرے سے تعاون کریں گے۔
یہ خبر بھی پڑھیں: اٹک: بس کے قریب دھماکا، ایک شخص جاں بحق ،7 زخمی
اس موقع پر وزیراعلیٰ پرویز خٹک نے کہا کہ جماعت اسلامی اب ایم ایم اے کا حصہ بن چکی ہے، ہمارا کوئی اختلاف ہے اور نہ کوئی جھگڑا، ہم خوشی خوشی الگ ہو رہے ہیں، جماعت اسلامی نے حکومت کے دوران ہماری کافی مدد کی۔ پرویز خٹک نے کہا کہ کل اسلام آباد میں فاٹا انضمام پر وفاقی نمائندوں سے ملاقات ہوئی، فیصلہ ہوا ہے کہ فاٹا خیبر پختونخوا میں ضم ہوجائے گا، 2019 میں فاٹا کو ضم کیا جائے گا۔ ان کا کہنا تھا کہ اپوزیشن نےعدم اعتماد کے لیے درخواست دی تو گورنر کے حکم کے مطابق فیصلہ ہوگا، اپوزیشن جماعتوں نے میرے ساتھ دینے کی یقین دہانی کرائی ہے۔
یہ خبر بھی پڑھیں: موبائل کارڈز پر کٹوتی، چیف جسٹس نے نوٹس لے لیا
دوسری جانب وزرا کی پریس کانفرنس کے بعد جماعت اسلامی کے 3 وزرا اور ایک پارلمیانی سیکرٹری مستعفی ہوگئے۔ جماعت اسلامی کے مستعفی ہونے والے وزرا میں وزیر بلدیات عنایت اللہ، وزیر خزانہ مظفر سید، وزیر مذہبی امور حبیب الرحمان اور پارلیمانی سیکرٹری محمد علی شامل ہیں۔ مستعفی ہونے والوں نے اپنے استعفے وزیراعلیٰ کو جمع کرادیئے ہیں۔
نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں
