اسلام آباد: پاکستان تحریک انصاف (پی ٹی آئی) نے چیف الیکشن کمشنر کیخلاف ریفرنس سپریم جوڈیشل کونسل میں دائر کر دیا ۔
چیف الیکشن کمشنر کے خلاف ریفرنس بابر اعوان کے ذریعے بھجوایا گیا ۔ ریفرنس کے مطابق چیف الیکشن کمشنر جان بوجھ کر بدانتظامی کر رہے ہیں ۔ اس کے علاوہ چیف الیکشن کمشنر آئینی ذمہ داریاں احسن طریقے سے ادا نہیں کر رہے ۔
پی ٹی آئی ریفرنس میں کہا گیا ہے کہ چیف الیکشن کمشنر پر ممنوعہ فنڈنگ کا فیصلہ جلد سنانے کیلئے دباؤ ڈالا گیا ۔ گزشتہ ماہ پی ڈی ایم وفد نے چیف الیکشن کمشنر سے ملاقات کی اور ملاقات کے چند روز بعد ہی ممنوعہ فنڈنگ کیس کا فیصلہ آگیا ۔
گزشتہ روز چیئرمین تحریک انصاف عمران خان نے کہا تھا کہ چیف الیکشن کمشنر نے ہم پر جھوٹے الزامات لگائے ۔ چیف الیکشن کمشنر اور فیصلے کے خلاف سپریم جوڈیشل کونسل جائیں گے ۔
انہوں نے کہا کہ سکندر سلطان نے 8 فیصلے ہمارے خلاف کیے ۔ الیکشن کمیشن کے بغیر جمہوریت نہیں چل سکتی ۔ جب لوگوں کو خریدا گیا تو بدنیت چیف الیکشن کمشنر نے ایکشن نہیں لیا ۔ سندھ ہاؤس میں کھلے عام پیسہ چلا چیف الیکشن کمشنر کو شرم نہیں آئی ۔ یو سف رضا گیلانی کے سینیٹ الیکشن میں پیسہ استعمال ہوا ۔ ملک میں جوئے کے پیسے سے الیکشن اور لوگوں کو خریدا جارہا ہے ۔
