پانی صرف سندھ کا مسئلہ نہیں بلکہ پورے پاکستان کا مسئلہ ہے : بلاول بھٹو زرداری

پانی صرف سندھ کا مسئلہ نہیں بلکہ پورے پاکستان کا مسئلہ ہے : بلاول بھٹو زرداری

اسلام آباد: نوازشریف کے بعد بلاول بھٹو بھی عدلیہ سے ناراض ہوگئے۔وزیراعلیٰ سندھ کو سپریم  کورٹ میں بلانے پر برہم ہو گئے ۔کہتے ہیں پانی کا بحران پورے ملک میں ہے۔یہ صرف سندھ کا مسئلہ نہیں  ہمیشہ سندھ کو ہی نشانہ کیوں بنایا جاتا ہے؟


ٹویٹ میں انہوں نے کہا کہ سی پیک کے بعد بھی بلوچستان کے کئی علاقوں میں پانی تک رسائی نہیں۔ پنجاب اور خیبرپختونخوا کے جنوبی علاقوں حتیٰ کہ وفاقی دارالحکومت اسلام آباد میں بھی پانی کے مسائل ہیں۔ اپنی ٹویٹ میں انہوں نے سندھ حکومت کی تعریفوں کے بھی پل باندھ دیئے ۔

ٹویٹ کیا کہ سندھ حکومت نے صاف پانی کی فراہمی کا مسئلہ حل کرنے کے لئے عملی اقدامات اٹھائے ہیں۔ سندھ بھر میں آراو پلانٹس میں سرمایہ کاری کی گئی ۔نہروں کو پختہ کیا گیا اور  نئے ڈیم بھی بنائے گئے ہیں۔ خوشی ہے کہ وزیراعلیٰ سندھ کو اپنا مقدمہ سپریم کورٹ کے سامنے پیش کرنے کا موقع ملے گا۔

یاد رہے کہ سپریم کورٹ نے وزیراعلیٰ سندھ مراد علی شاہ کو  سندھ میں صاف پانی کی فراہمی کے مسئلے پر طلب کیا ۔سپریم کورٹ میں جسٹس ثاقب نثار نے ریمارکس دیے کہ  عوام کو پانی نہیں ملتا تو سرکاری افسروں سے نہیں وزرائے اعلیٰ سے پوچھ گچھ ہوگی۔