سابق خاتونِ اول مشل اوباما کی کتاب نے فروخت کے نئے ریکارڈ قائم کر دیے

سابق خاتونِ اول مشل اوباما کی کتاب نے فروخت کے نئے ریکارڈ قائم کر دیے
فوٹو سوشل میڈیا

واشنگٹن: سابق امریکی صدر بارک اوباما کی اہلیہ مشل اوباما کی بائیو گرافی ’بی کمنگ‘ نے امریکا میں فروخت کا نیا ریکارڈ قائم کر دیا۔


تفصیلات کے مطابق مشل اوباما کی خود نوشت ’Becoming‘ نے دو ہفتوں کے اندر رواں سال امریکا میں شائع شدہ کتابوں کی فروخت کا ریکارڈ توڑ دیا ہے۔

ابتدائی پندرہ دن میں سابق خاتونِ اوّل کی کتاب بی کمنگ کی 20 لاکھ سے زائد کاپیاں فروخت ہوئیں۔امریکا میں ڈیٹا جمع کرنے والے ایک ادارے کا کہنا ہے کہ اس سال شائع ہونے والی کتابوں میں کسی بھی کتاب کی فروخت بیس لاکھ تک نہیں پہنچی۔مشل اوباما کی سوانحِ حیات نہ صرف امریکا بلکہ آسٹریلیا، برطانیہ، فرانس، جرمنی، کوریا اور جنوبی افریقا میں بھی بیسٹ سیلر رہی۔

اس کتاب کا ترجمہ اکتیس زبانوں میں کیا گیا ہے، کتاب میں مشل اوباما نے اپنے شوہر کے ساتھ گزارے دنوں کی روداد بیان کی ہے بالخصوص صدارتی محل میں گزرے دنوں کا احوال مذکور کیا گیا ہے۔خیال رہے کہ اس سوانحِ حیات کو اس وقت شہرت حاصل ہوئی تھی جب اس کے ایک اقتباس میں مشل اوباما نے انکشاف کیا کہ ان کے بچے آئی وی ایف کے ذریعے پیدا ہوئے۔