چلی ہے رسم کہ

ظلم و زیادتی کے باجود خاموش رہنا اور برداشت کرنا غلامانہ ذہنیت ہے باشعور اور آزاد سوچ والا حقوق کے متعلق نہ صرف سوال کرتا ہے بلکہ مسلسل ظلم وزیادتی پر تنگ آکر احتجاج کاراستہ بھی اختیار کرتا ہے مگر یہاں حکمران توقع کرتے ہیں کہ اُن سے کچھ نہ پوچھا جائے وہ جو بھی کریں عوام سرتسلیمِ خم کریں ایسا نہیں ہوسکتا کسی سے دریافت کرلیں کہ کیا وطنِ عزیز کے تمام باسیوں کو برابر حقوق میسر ہیں؟ کوئی بھی ہاں میں جواب نہیں دے گا کیونکہ ملکی وسائل کا بڑاحصہ صاحبانِ اقتدار و اختیار پرخرچ ہوتا ہے اور جوں جوں اُن کی تجوریاں بھرتی جارہی ہیں عوام مسائل کی گرداب میں دھنستے جا رہے ہیں  تعلیم وصحت کی سہولتیں اور بنیادی حقوق تو ایک طرف عوام دووقت کی روٹی کے لیے پریشان ہے لیکن صاحبانِ اقتدارواختیار کوصورتحال کاادراک نہیں یا شاید عوامی مسائل سے ناآشنا ہیں کیونکہ اگر آشناہوتے تو آئے روزپیٹرول،بجلی اور آٹے کی قیمتیں بڑھانے کاظلم ہر گزنہ کرتے۔ 
حالات بدل چکے مگر بدلے حالات کا اشرافیہ کوبھی احساس ہے بادی النظر میں ایسا نہیں لگتا پشاور پولیس لائن کی مسجد میں ہونے والے خودکش دھماکے میں 84 نمازی جان سے گئے میانوالی میں خون کی ہولی کھیلی گئی بلوچستان کے طو ل و عرض میں آئے روز موت کارقص ہوتا ہے لیکن امن بحال کرنے کا ایجنڈا حکمرانوں کی ترجیحات میں کہیں نظر نہیں آتابلکہ دہشت گردوں اور وطن دشمن عناصر پر ہاتھ ڈالنے کے بجائے مخالف سیاسی قوتوں کی پکڑ دھکڑسے اُن کا ناطقہ بند کیا جارہا ہے اِس طرزِ عمل کو خود غرضانہ اور سیاسی مفادپرستی کہیں یا لاپروائی کا نام دیں عوام حکمرانوں اور اِداروں دونوں سے بدظن ہوتے جارہے ہیں جب عام انتخابات کے مطالبے پر بے نیازی اور بے زاری ظاہر کی جاتی ہے تو لوگ سمجھتے ہیں کہ بڑے منصبوں پر فائز عام آدمی کے پاس جانے سے گھبراتے ہیں اسی لیے اُن کی اولین کوشش ہے کہ مخالف سیاسی قوتوں پر عرصہ حیات وبال بناکر اِتنا دیوار سے لگا دیا جائے کہ انتخابی معرکے میں مقابلے پر آنے کی جرأت نہ کریں یہ سوچ کسی طور جمہوری،قابلِ تحسین یا قابلِ رشک قرار نہیں دی جا سکتی ماضی میں ہوسِ اقتدار کاشکارلوگوں نے مادرِ ملت محترمہ فاطمہ جناح کو بدترین دھاندلی سے ہراکر ملکی یکجہتی پارہ پارہ کی اِس گھاؤ کے نتیجے میں ملک دولخت ہو ا کیا ہم نے ماضی سے کچھ سیکھا ہے؟بظاہر ایسا کوئی اشارہ نہیں ملتا کہ اقتدار واختیار کے مالکان کو نازک صورتحال کا ادراک ہے آج بھی فرائض سے زیادہ مخالف سیاسی قوتوں پر توجہ ہے عمران خان اور اُن کے ہمرکاب افراد کوچُن چُن کر ایسے کیسوں میں جکڑا جارہا ہے جن سے نہ صرف بدنامی ہو بلکہ ہراساں کرنے کا مقصدحاصل ہو جبکہ حکومت میں شامل چہروں،اُن کے رشتہ داروں اور حمایتی افرادوآفیسران جن پر اربوں کے بدعنوانی کے الزامات ہیں احتساب عدالتیں کلین چٹ دیتی جارہی ہیں لیکن مخالف سیاسی قوتوں پر بادہ نوشی جیسے گھٹیا کیس بنائے جارہے ہیں تنقید کرنا ملک میں جرم بنا دیا گیا ہے عجیب چلی ہے رسم کہ......؟
 زیادہ ترجماعتیں اقتدار میں ہیں اُن کے پاس وسائل ہیں بہترہے میسر موقع سے فائدہ اُٹھائیں اور عوامی مسائل حل کریں مگر ملکی وسائل کے زیاں کے متعلق سوال کرنا جُرم بنادیاگیا ہے حالانکہ یہ جُرم نہیں نہ ہی سوال کرنے یا بولنے کو مشروط کیا جا سکتاہے البتہ دلیل اور ثبوت کا مطالبہ درست ہے نوآبادیاتی قوانین کے تحت بغاوت کے الزامات میں گرفتاریاں کرنا اورپھر سزائیں دلوانے کے لیے اِداروں کابے جا استعمال غلط ہے اِس رویے پر نظر ثانی کی ضرورت ہے جتنا دھیان مخالف سیاسی قوتوں کی زبان بندی پر دیا جارہا ہے اگرعوامی مسائل پرتوجہ دی جائے توملک سے پیٹرول،آٹے،چینی کے بحرانوں کو مستقل طورپرختم کیاجاسکتاہے ساتھ ہی ملکی معیشت درست ڈگر پر آچکی ہوتی جب سیاسی انتقامی کارروائیاں عروج پر ہوں گی تو بھلا اپوزیشن جماعتیں کیسے وزیرِ اعظم کی طلب کردہ اے پی سی میں شریک ہو سکتی ہیں؟ کسی کواگر ساتھ بٹھانا ہے تو بات چیت کے لیے افہام و تفہیم کا ماحول بنانا بھی حکومتی ذمہ داری ہے توہین جیسے مضحکہ خیز الزامات سے اِداروں یا شخصیات کی عزت وتوقیر میں اضافہ نہیں ہوتا۔
اِس میں شائبہ نہیں کہ ملک میں آئے روزایسی بے شمار جھوٹی ایف آئی آر ہوتی ہیں جن میں قتل، اقدامِ قتل سمیت دیگر سنگین نوعیت کے الزامات لگائے جاتے ہیں مگر ابتدا میں مناسب پوچھ تاچھ سے الزامات کی صداقت چیک کی جاتی ہے بعد میں گرفتاری عمل میں آتی ہے اگر مقدمہ جھوٹا ثابت ہوتو خارج کر دیا جاتا ہے مگر آصف زرداری کاوجوداِتنا مقدس ہے کہ عمر رسیدہ سابق وزیرِ داخلہ شیخ رشید کو لاوارثوں کی طرح جکڑ لیا جاتا ہے اِس سے پہلے اُن کے پاس دہائیوں سے موجود لال حویلی ایک بھونڈے جواز کے ساتھ خالی کرالی گئی ایسے حربوں 
سے یہ تاثر گہرا ہورہا ہے کہ حکومت اپنی غیر مقبولیت سے پریشان اور مقبول ترین حریف سیاسی قوتوں سے خوفزدہ ہے اسی لیے انتخاب میں جانے سے قبل سیاسی میدان صاف کرنے کے منصوبے پر عمل پیرا ہے سچ یہ ہے کہ ای سی پی اور زرداری توہین کو جواز بناکر کی جانے والی کارروائیوں سے حاکمانِ وقت کی نیک نامی میں اضافہ نہیں ہوا۔
 عمران خان کے ساتھ دوسری اتحادی جماعت مسلم لیگ ہے جو پنجاب میں نگران حکومت بنتے ہی پولیس،ایف آئی اے سمیت کئی دیگراِداروں کا تختہ مشق ہے آئے روز بے بنیاد اور من گھڑت کیس بنائے جارہے ہیں کوٹلہ ہسپتال کے توسیعی منصوبے کا سنگ بنیاد رکھنے کی تقریب پر بلوائیوں نے حملہ کیاجس کا ایس ایچ او کی مدعیت میں مقدمہ نمبر 11/23 تھانہ ککرالی درج ہوا پولیس مدعی ہونے کے باوجود حکومت تبدیل ہوتے ہی دہشت گردی کی دفعات لگاکر متاثرہ فریق کواب ملزم بنا دیا گیا ہے یہ اقدام سیاسی گھرانے کو پریشان کرنے اور دباؤڈالنے کے حربے کے سواکچھ نہیں چوہدری موسیٰ الٰہی عبوری ضمانت کراچکے لیکن وقوعہ کے وقت موقع پر موجود نہ ہونے کے باوجود مسلم لیگ کے صدر اور سابق وفاقی وزیرچوہدری وجاہت حسین کی گرفتار ی کے لیے پولیس جگہ جگہ چھاپے ماررہی ہے کنجاہ چھاپے کے دوران ایک مخصوص اِدارے کے تین عدد کالے رنگ کے ویگوڈالے خود رہنمائی کرتے رہے جیسے سیاسی شخصیت نہیں بلکہ کسی دشمن ملک کے جاسوس کی گرفتاری کا معاملہ ہو حالانکہ سب کو پتہ ہے چوہدری مونس الٰہی بیرونِ ملک،چوہدری پرویز الٰہی لاہورہیں جبکہ چوہدری وجاہت حسین یہاں نہیں رہتے پھر بھی پولیس کہتی ہے کہ چوہدری وجاہت حسین کی گرفتاری کے لیے گئے ظاہرہے ایسی کارروائیوں کا مقصد عمران خان کا ساتھ دینے سے روکنا ہے مگر چھاپے سے پوراگجرات سراپا احتجاج بن گیانہ صرف تاجروں نے احتجاجاََ دکانیں بند کردیں بلکہ جی ٹی روڈتک ایک بہت بڑی احتجاجی ریلی بھی نکالی گئی۔
دو فروری کو چوہدری موسیٰ الٰہی کی انسدادِ دہشت گردی کی عدالت گوجرانولہ میں عبوری ضمانت کی تاریخ تھی لیکن شب سواتین بجے تھانہ کڑیانوالہ میں 31/23مزید ایک بوگس ایف آئی آر درج کرائی گئی جس کے مدعی کے بارے میں عام لوگ کہتے ہیں کہ وہ آئس جیسے نشے کی لت میں مبتلا اول فول بکنے والا ایک غیر سنجیدہ شخص ہے اور پولیس پر فائرنگ کے الزام میں خود بھی گرفتار رہ چکا ہے کیا اِداروں پر اِتناکڑا وقت آگیا ہے کہ وہ ساکھ سے محروم افراد کا سہارا لینے پر مجبور ہیں؟ ہفتہ قبل جو درخواست پیش کی گئی اُس میں چوہدری وجاہت حسین کے ساتھ اُن کے صاحبزادے چوہدری حسین الٰہی کو نامزد کیا گیا مگر ایف آئی آر درج کرنے سے قبل جب یہ معلوم ہواکہ چوہدری حسین الٰہی تو ملک سے ہی باہرہیں یہ معلوم ہونے پر درخواست واپس لے لی گئی مگرپھردوفروری کی رات کوکہیں سے حکم ملنے پرمقدمہ درج کر لیاگیا صاف ظاہرہے اِس کا مقصد چوہدری موسیٰ الٰہی کو عدالت پیش ہونے سے روکنا اور گرفتار کرنا ہے ویگو ڈالے والے صاف الفاظ میں کہتے ہیں کہ عمران خان اب کبھی جیت نہیں سکتا اگر چوہدری خاندان نے بھی مستقبل میں سیاسی طورپر زندہ رہنا ہے تو عمران خان سے ہرصورت الگ ہو نا ہوگا یہ کیسی چلی ہے رسم کہ....؟چوہدری وجاہت حسین گجرات کے ایک دلیر اور مقبول رہنماایک رحمدل اور مہربان شخصیت ہیں تیس پینتیس سالہ رفاقت کے باوجود ایسا منظر کبھی نہیں دیکھا کہ کسی سوالی نے دامن پھیلایا ہو اور وہ خالی واپس کر دیں اب سوال یہ ہے کہ جب ملک میں امن و امان کا مسئلہ بگڑتا جارہا ہے لوگ مہنگائی سے تنگ ہیں ملکی معیشت تباہی کے دہانے پرہے اِن حالات میں جس بھی عاقبت نااندیش نے حریف سیاستدانوں کے خلاف انتقامی کارروائیوں کامشورہ دیا ہے وہ سب کچھ ہو سکتا ہے حکمرانوں یا اِداروں کا خیرخواہ ہرگز نہیں۔