مون سون بارشوں سے ملک بھر میں 43 افراد جاں بحق

مون سون بارشوں سے ملک بھر میں 43 افراد جاں بحق

اسلام آباد:  نیشنل ڈیزاسٹرمنیجمنٹ اتھارٹی (این ڈی ایم اے)نے ملک بھر میں ہونے والی حالیہ بارشوں کے دوران ہونے والے نقصانات کی رپورٹ جاری کردی ہے جس کے مطابق 43 افراد جاں بحق ہوئے۔


این ڈی ایم اے کی رپورٹ کیمطابق, بارشوں اور سیلاب سے پنجاب میں 11، خیبرپختونوا  میں 2، سندھ میں 6 اور بلوچستان میں 15 افراد جاں بحق ہوئے۔بارشوں اور سیلاب سے فاٹا میں 4 اور آزاد کشمیر میں بھی 5 افراد جاں بحق ہوئے۔

رپورٹ کے مطابق رواں سال کی مون سون بارشوں سے ملک بھر میں 60 مکانات متاثر ہوئے۔این ڈی ایم اے کی رپورٹ میں کہا گیا ہے کہ وفاق کے زیر قبائلی علاقے وزیرستان میں گزشتہ 24 گھنٹوں کے دوران بارش سے 4 بچے جاں بحق ہوئے جبکہ 4 بچوں کو بچا لیا گیا۔جاں بحق ہونے والے چار بچوں میں سے 3 کی لاشیں مل گئی ہیں جبکہ 1 بچہ تاحال لاپتا ہے۔

دوسری جانب لسبیلہ کی تحصیل حب میں طغیانی سے جاں بحق ہونے والے تمام افراد کی لاشیں نکال لی گئیں جبکہ سیلاب کے باعث موسی خیل کنگری روڈ مختلف مقامات پر بہہ گئی ہے۔مون سون بارشوں کے بعد نوشہرہ کے مقام پر دریائے کابل اور مرالہ کے مقام پر دریا چناب میں نچلے درجے کا سیلاب ہے تاہم دیگر دریاوں میں صورت حال معمول کے مطابق ہے۔

این ڈی ایم اے کا کہنا ہے کہ تربیلا ڈیم میں پانی کے ذخیرے کی گنجائش 1550 فٹ اور موجودہ سطح 1475 فٹ ہے اور مزید 4.8 فی صد گنجائش رہ گئی ہے۔منگلا میں پانی ذخیرہ کرنے کی گنجائش 3.25 فیصد رہ گئی ہے جبکہ 1242 فٹ اور موجوہ سطح 1201 فٹ ہے۔

نیوویب ڈیسک< News Source