اسلام آباد: بلاول بھٹو زرداری نے کہا ہے کہ رائیونڈ کے وزیراعظم کو سزا کے باوجود باہر بھیج دیا گیا اور یہ احتساب نہیں بلکہ پولیٹیکل انجینئرنگ اور سیاسی انتقام ہے، وزیراعظم کی بہن پر الزام لگے تو کچھ نہ ہو اور یہ کس قسم کا ایک پاکستان ہے بلکہ وزیراعظم کے دوستوں پر الزام لگے تو وہ جیل نہیں جاتے۔
چیئرمین پاکستان پیپلزپارٹی بلاول بھٹو نے پریس کانفرنس کرتے ہوئے کہا کہ قائد حزب اختلاف پنجاب سے ہو تو ضمانت مل جاتی ہے، قائد حزب اختلاف سندھ سے ہو تو جیل میں ہوتا ہے، ہم کہیں درخواست کرنے نہیں جا رہے کہ آپ کو گرایا جائے، اپوزیشن جماعتوں میں آپ کو گرانے کی ہمت نہیں تو عام انتخابات کا انتظار کریں گے، وزیراعظم پر خود بھی الزام لگے تو کچھ نہیں ہوتا، خان صاحب ! اب جو احتساب ہوگا وہ عوام کریں گے، الیکشن کمیشن کو انتخابی آرڈیننس مسترد کرنا ہوگا۔
بلاول بھٹو کا کہنا تھا کہ حکومت کو عام آدمی کا احساس ہی نہیں ہے اور وزیراعظم کا عام آدمی سے کوئی تعلق نہیں جبکہ عام پاکستانی دکھ اور مشکلات سے گزر رہا ہے، غربت اور بے روزگاری تاریخ کی انتہا کو پہنچ چکی ہے اور عام آدمی کا دن گزشتہ روز سے زیادہ برا ہوتا ہے۔
چیئرمین پیپلزپارٹی نے کہا کہ ہمارے وزیراعظم کہتے ہیں ملک ترقی کر رہا ہے ار ان کے اے ٹی ایمز کیلئے مشکل وقت ضرور ختم ہوا ہوگا، وزیراعظم، وزرا، ترجمان معیشت پر بیان بازی کر رہے ہیں اور ہمارے وزیراعظم ترقی کا ڈھول پیٹ رہے ہیں جس وزیراعظم نے مہنگائی کے ریکارڈ توڑے وہ کہتے ہیں ملک ترقی کر رہا ہے اور کہتے ہیں جی ڈی پی میں اضافہ ہوا، شرح نمو کے دعوے حقیقت کے برعکس ہیں۔
بلاول بھٹو نے کہا کہ آپ کشکول لے کر ہر ملک کیوں جا رہے ہیں اور آپ عرب ممالک جا کر بھیک کیوں مانگ رہے ہیں اور بجٹ پیش ہو گا تو دودھ کا دودھ اور پانی کا پانی ہو جائے گا جبکہ امید ہے بجٹ کے بعد آئی ایم ایف کے شکنجے سے نکل جائیں گے اور ان لوگوں کو پتہ ہی نہیں پاکستان کے کیا حالات ہیں۔
