اسلام آباد،پاکستان کرکٹ بورڈ کے چیئرمین احسان مانی نے کہا ہے کہ میں کوئی تنخواہ نہیں لیتا جتنے وسیم خان قابل ہیں اتنا پورے پاکستان میں کوئی نہیں۔قومی اسمبلی کی قائمہ کمیٹی برائے بین الصوبائی رابطہ کے اجلاس میں ان کا کہنا تھا کہ ان کیمرہ پوچھا جائے کہ کتنی تنخواہیں لی جارہی ہیں ۔
تفصیلات کے مطابق آغا حسن بلوچ کی زیرِ صدارت ہونے والے اجلاس میں پاکستان کرکٹ بورڈ کی کارکردگی اورتنخواہوں سے متعلق پوچھا گیا تو چیئرمین احسان مانی نے کہا کہ ان کیمرہ پوچھا جائے تنخواہیں کتنی لی جارہی ہیں۔
جس پر رکن کمیٹی مہرین رزاق نے کہا کہ ان کیمرہ وہ ہوتی ہیں جوملکی سلامتی سے متعلق ہوں، تنخواہیں کب سے ملکی سلامتی کا ایشو ہو گیا؟
ممبر کمیٹی روبینہ جمیل نے کہا کہ ہمیں بجٹ کا بتایا جائے اورکتنا پیسہ کدھر جاتا ہے؟ چیئرمین پی سی بی نے جواب دیا کہ میں کوئی تنخواہ نہیں لیتا سب کچھ ویب سائٹ پرموجود ہے ہمارے تمام اکاؤنٹس کا ڈیٹا موجود ہےوہ دیا جائے گا، ہمارے4 لیول کےآڈٹ ہوتے ہیں کچھ چھپ نہیں سکتا۔
ممبر کمیٹی اقبال خان نے چیف ایگزیکٹو پی سی بی سے متعلق پوچھا کہ وسیم خان کی قابلیت کیا ہے؟ چیئرمین پی سی بی نے جواب دیا کہ جتنے وسیم خان قابل ہیں اتنا پورےپاکستان میں کوئی نہیں۔
ممبر کمیٹی اقبال خان نے کہا کہ خدا کو مانیں اس نےکونسا اب تک کارنامہ کیا ہے، فواد عالم سمیت باجوڑ کے کئی بہترین کرکٹرز کو پوچھا تک نہیں جاتا، ایک ایم این اےکےکہنےپر کھلاڑی رکھنے ہیں توکیامیرٹ ہے، لوگ سفارش پر رکھے جاتے ہیں۔
چیئرمین پی سی بی احسان مانی نے جواب دیا کہ نہیں ایسا کچھ نہیں،سب میرٹ پر ہوتا ہے۔
