اسلام آباد: پاکستان مسلم لیگ (ن) کی نائب صدر اور سابق وزیراعظم نواز شریف کی صاحبزادی مریم نواز نے وزیراعظم پاکستان عمران خان کی ٹویٹ پر ردعمل دیدیا۔
تفصیلات کے مطابق وزیراعظم پاکستان عمران خان کے ٹوئٹر ہینڈل سے جاری پیغام میں کہا گیا کہ ’میں ای سی پی کی جانب سے سمندر پار پاکستانیوں کے عطیات پر مشتمل پی ٹی آئی کی فنڈنگ کی پڑتال کا خیرمقدم کرتا ہوں۔ ہمارے نظم مال کو جتنا کھنگالا جائے گا اتنی ہی صراحت سے حقائق واضح ہوں گے اور قوم سمجھ سکے گی کہ کیسے پی ٹی آئی ہی وہ واحد سیاسی جماعت ہے جس کا نظم مال سیاسی فنڈ ریزنگ کے اس مربوط نظام پر مشتمل ہے جس کی بنیادیں باضابطہ ڈونرز پر استوار ہیں۔‘
اسی سلسلے کی دوسری ٹویٹ میں وزیراعظم نے اپنی بات جاری رکھتے ہوئے کہا کہ ’میں ای سی پی کی جانب سے دیگر دو بڑی جماعتوں (ن) لیگ اور پی پی کے مالیات کی اسی قسم کی پڑتال کا منتظر ہوں۔ اس سے قوم کو باضابطہ پولیٹیکل فنڈ ریزنگ اور قوم کی قیمت پر نوازشات کے بدلے سرمایہ دار حواریوں اور مفاد پرست گروہوں سے مال اینٹھنے کے مابین فرق سمجھنے میں مدد ملے گی۔‘
مریم نواز شریف نے وزیراعظم کے اس ٹویٹ کے جواب میں ٹویٹ کیا کہ’اچھا؟ تو پھر سات سال سے دھونس اور طاقت کے ذریعے کیس کو چلنے کیوں نہیں دیا؟ کیوں اتنے سال فرار اختیار کرتے رہے اور پھر منتیں کرتے رہے کہ رپورٹ ریلیز نہ کی جائے؟ پاگل سمجھ رکھا ہے لوگوں کو کہ جو بولو گے لوگ مان جائیں گے؟ تیاری رکھنا، حساب کتاب کا وقت آن پہنچا ہے! انشاءاللہ!‘
