خواجہ سعد رفیق اور سلمان رفیق کانام ای سی ایل میں نہیں ڈالا گیا ، فواد چوہدری

خواجہ سعد رفیق اور سلمان رفیق کانام ای سی ایل میں نہیں ڈالا گیا ، فواد چوہدری
تصویر بشکریہ فواد چوہدری ٹوئٹر

اسلام آباد:  وفاقی وزیر اطلاعات فواد چوہدری نے خواجہ سعد رفیق اور ان کے بھائی کا نام ایگزٹ کنٹرول لسٹ (ای سی ایل) میں ڈالنے کی خبروں کی تردید کر دی ہے۔


فواد چوہدری نے کہا سعد رفیق کا نام ای سی ایل میں ڈالنے کافیصلہ نہیں ہوا اور اس حوالے سے سامنے آنے والی خبروں کی تردید کرتے ہیں۔ ان کا کہنا تھا کہ نیب آزاد ادارہ ہے اور وفاق قانون کے تحت نیب کی مدد کرے گا جبکہ نیب کے فیصلوں پر عملدرآمد بھی کیا جائے گا۔

خیال رہے کہ اس سے قبل صوبائی وزیراطلاعات فیاض الحسن چوہان نے نجی ٹی وی چینل سے گفتگو کرتے ہوئے کہا کہ خواجہ سعد رفیق اور خواجہ سلمان رفیق کا نام ای سی ایل میں ڈال دیا گیا ہے جبکہ فیاض الحسن چوہان سے پہلے صوبائی اسمبلی میں اپوزیشن لیڈر حمزہ شہباز نے بھی پریس کانفرنس کرتے ہوئے انکشاف کیا تھا کہ خواجہ برادران کا نام ای سی ایل میں ڈال دیا گیا ۔انہوں نے کہا تھا کہ یہ ضمنی الیکشن سے پہلے دھاندلی کی گئی ہے ۔