لاہور: سابق وزیر اعظم شاہد خاقان عباسی نے کہا ہے کہ ان 700 افراد کے ساتھ وہی سلوک ہونا چاہیے جو نواز شریف کے ساتھ ہوا ۔
میڈیا سے گفتگو کرتے ہوئے شاہد خاقان عباسی نے کہا کہ پنڈورا پیپرز میں 700 پاکستانیوں کے نام آئے ۔ 700 لوگ کون ہیں ، عوام جاننا چاہتے ہیں ۔ پاناما پیپرز میں نواز شریف کا نام بھی نہیں تھا لیکن جے آئی ٹی بنائی گئی ، انہوں نے کہا کہ اگر ملک میں انصاف کا نظام ایک ہے تو 700 لوگوں کو بھی جیل جانا چاہیے ۔
سابق وزیر اعظم نے کہا کہ چیئرمین نیب نے 700 لوگوں کے خلاف کوئی مقدمہ درج نہیں کیا جبکہ بغیر ثبوت کے شہباز شریف ، احسن اقبال کو جیل میں ڈال دیا گیا تھا ۔
انہوں نے کہا کہ پنڈورا پیپرز پر بنائی گئی تحقیقاتی کمیٹی کی کوئی حیثیت نہیں ، ہمارے ساتھ جیل پہلے ، تفتیش بعد میں ہے ۔ نواز شریف وزیراعظم ہوتے ہوئے جے آئی ٹی کے سامنے پیش ہوئے ۔
لیگی رہنما نے کہا کہ 3 سال گزر گئے ، یہ نہیں بتا سکے ہم پر الزام کیا ہے ۔ وزیراعظم ، وزرا روز پریس کانفرنس کرتے ہیں اور الزام لگاتے ہیں ۔ نیب سوائے نواز شریف کے کسی اور کو سزا نہیں دے سکا ۔ نواز شریف کو سزا بھی جج کو بلیک میل کرکے دلوائی گئی ۔
شاہد خاقان عباسی نے کہا کہ قانون کہتا ہے چیئرمین نیب کی مدت میں توسیع نہیں ہو سکتی جبکہ وزیراعظم عمران خان مشاورت سے انکار کر رہا ہے ۔ نیب کے ادارے نے ملک کو کروڑوں کا نقصان پہنچایا ۔
