امریکا کے ساتھ تعلقات مستحکم بنانے کے خواہشمند ہیں، وزیراعظم

امریکا کے ساتھ تعلقات مستحکم بنانے کے خواہشمند ہیں، وزیراعظم

فوٹو/ اسکرین گریب نیو نیوز

اسلام آباد: وزیراعظم عمران خان پاکستان اور امریکا کے درمیان تعلقات کی بحالی کے لیے پرامید ہیں۔امریکی وزیر خارجہ مائیک پومپیو نے دورہ پاکستان کے دوران وزیراعظم عمران خان اور وزیر خارجہ شاہ محمود قریشی سے ملاقاتیں کی۔وزیراعظم ہاؤس اسلام آباد میں ہونے والی ملاقات کے دوران پاک امریکا تعلقات کی بحالی کے حوالے سے سوال پر وزیراعظم عمران خان نے جواب دیا کہ وہ شروع سے ہی پرامید ہیں اور ایک اسپورٹس مین ہمیشہ پر امید رہتا ہے۔

وزیراعظم عمران خان سے امریکی وزیر خارجہ مائیک پومپیو کی ملاقات کا اعلامیہ بھی جاری کر دیا گیا ہے۔اعلامیے کے مطابق وزیراعظم عمران خان کا کہنا تھا کہ میری حکومت کا ایجنڈا انسانی ترقی اور غربت کے خاتمے پر توجہ مرکوز کرنا ہے۔وزیراعظم نے کہا کہ حکومت کی ترجیحات میں علاقائی امن و استحکام بنیادی جزو ہیں۔پاک امریکا تعلقات کے حوالے سے عمران خان کا کہنا تھا کہ پاکستان امریکا کے ساتھ احترام واعتماد کی بنیاد پر تعلقات کو مستحکم بنانے کا خواہش مند ہے۔انہوں نے کہا کہ تمام ہمسایوں سمیت خطے کے ممالک کے ساتھ امن پر مبنی تعلقات چاہتے ہیں۔

وزیراعظم عمران خان نے کہا کہ پاکستان افغانستان میں امن اور استحکام کا خواہاں ہے۔امریکی  وزیر خارجہ دورہ پاکستان کے بعد بھارت کے لیے روانہ ہو گئے ہیں۔مائیک پومپیو نے اپنے سوشل میڈیا اکانٹ پر لکھا کہ دورہ پاکستان کے دوران وزیراعظم عمران خان اور وزیر خارجہ شاہ محمود قریشی سے ملاقات ہوئی۔مائیک پومپیو نے اپنے ٹوئٹ میں مزید لکھا کہ پاکستانی حکام کے ساتھ ہونے والی ملاقاتوں میں سفارتی اور ملٹری ٹو ملٹری تعلقات پر تبادلہ خیال کیا گیا.