لاہور: پاکستان مسلم لیگ ن کے صدر اور قائد حزب اختلاف شہباز شریف نے کہا کہ مہنگائی پر کنٹرول عمران خان کے بس میں نہیں لیکن استعفیٰ دینا تو بس میں ہے نا ۔
اپنی ٹویٹ میں شہباز شریف نے وزیراعظم سے فوری مستعفی ہونے کا مطالبہ کر دیا ، انہوں نے کہا کہ چینی کے بعد پٹرول اور بجلی کی قیمتوں میں مزید اضافہ عوام پر مہنگائی کی بمباری ہے ۔
https://twitter.com/CMShehbaz/status/1456860729491918849?s=20
صدر ن لیگ نے مزید کہا کہ ظلم کی حکومت نہیں چل سکتی ، وزیراعظم عمران خان کا استعفیٰ عوام کیلئے بڑا ریلیف ہوگا ۔
دوسری جانب ، وزیراعلیٰ پنجاب سردار عثمان بزدار نے چینی کی قیمت میں مصنوعی اضافے کا نوٹس لیتے ہوئے آج اہم اجلاس طلب کر لیا ۔ اجلاس میں چینی کی قیمت میں استحکام لانے کے لئے فوری اقدامات کئے جائیں گے ۔ عثمان بزدار نے کہا کہ چینی کی قیمت میں مصنوعی اضافہ کسی صورت برداشت نہیں ۔
ذرائع کے مطابق ، اجلاس میں صوبائی وزیر صنعت میاں اسلم اقبال ، چیف سیکرٹری ، ایڈووکیٹ جنرل پنجاب ، پرنسپل سیکرٹری وزیراعلیٰ ، سیکرٹری خوراک ، سیکرٹری قانون ، سیکرٹری زراعت ، سیکرٹری صنعت ، کمشنر لاہور ڈویژن اور متعلقہ حکام شریک ہوں گے ۔
