راولپنڈی: عوامی مسلم لیگ کے سربراہ اور سابق وفاقی وزیر داخلہ شیخ رشید احمد نے قومی اسمبلی کے حلقہ این اے 60 سے ضمنی الیکشن میں حصہ لینے کا اعلان کیا ہے۔
تفصیلات کے مطابق شیخ رشید سے اڈیالہ جیل میں فیملی ممبران نے ملاقات کی جس دوران ان کی صحت اور ضمنی الیکشن کے حوالے سے گفتگو ہوئی جبکہ شیخ رشید نے حلقہ این اے 60 سے عوامی مسلم لیگ کے امیدوار کے طور پر کاغذات نامزدگی پر دستخط کئے۔
ذرائع کا کہنا ہے کہ شیخ رشید کے کاغذات نامزدگی بدھ کے روز الیکشن کمیشن آف پاکستان (ای سی پی) میں جمع کرائے جائیں گے جبکہ وہ دوات کے نشان پر انتخابات میں حصہ لیں گے۔
ذرائع کے مطابق شیخ رشید کے بھتیجے اور سابق رکن اسمبلی شیخ راشد کا کہنا ہے کہ حلقہ این اے 62 سٹی سے وہ بلے کے نشان پر الیکشن لڑیں گے۔
اہل خانہ سے گفتگو کرتے ہوئے شیخ رشید احمد نے کہا کہ عمران خان کا ساتھ نہیں چھوڑوں گا، اگر ضمانت نہ ہوئی تو جیل میں بیٹھ کر الیکشن لڑوں گا۔
