چینی فوجیں ہر وقت جنگ کیلئے تیار رہیں، صدر شی جن پنگ نے حکم دیدیا

Chinese troops should be ready for war at all times, President Xi Jinping ordered
کیپشن:   فائل فوٹو

بیجنگ: چینی صدر شی جن پنگ نے عالمی سطح پر ہونے والی تبدیلیوں کی وجہ سے اپنی فوج کو ہمہ وقت جنگ کیلئے تیار رہنے کا حکم دیدیا ہے۔ 

چینی صدر شی جن پنگ کی جانب سے جاری حکم میں کہا ہے کہ ملک کی تمام افواج ہر لمحہ اور ہر گھڑی کسی بھی ممکنہ کارروائیوں کیلئے تیار رہیں۔ افواج کو چاہیے کہ وہ اپنی تربیت مزید بہتر اور ٹیکنالوجی کا استعمال ضروری بنائیں۔

ان کا کہنا تھا کہ کسی بھی قسم کی محاذ آرائی کیخلاف پیپلز لبریشن آرمی کے جوان ہر وقت تیار اور چوکس رہیں، قوت کو مضبوط کریں اور ذہن میں صرف فتح کا حصول رکھیں۔ چینی میڈیا کے مطابق صدر شی جن پنگ نے اس سلسلے میں ایک اہم فیصلہ کرتے ہوئے ایک نے حکم نامے پر دستخط کر دیئے ہیں۔

اس حکم نامے میں کہا گیا ہے کہ فوج کی تربیت، ان کی جنگی صلاحیتوں اور تربیت کے نظام کو بہتر بنانے پر اپنی پوری توجہ مرکوز کی جائے۔ خیال رہے کہ اس سے قبل چینی صدر شی جن پنگ کی جانب سے اپنی فوج کیلئے 2018ء میں اسی قسم کا حکم نامہ جاری کیا تھا۔

یہ حکم انہوں نے 2018ء میں فوج سے اپنے خطاب میں دیا تھا۔ تاہم اب انہوں نے تحریری طور پر اس کو لازم قرار دیدیا ہے۔ ذہن میں رہے کہ چین کے صدر شی جن پنگ کا شمار اپنے ملک کے ان عظیم لیڈروں میں ہوتا ہے جنہوں نے اپنے ملک کی ترقی میں اہم کردار ادا کیا۔

شی جن پنگ 2012ء میں اپنی مسلح افواج کے سربراہ اعلیٰ بنے تھے۔ اس کے بعد سے انہوں نے چین کی فوج کو جدید خطوط پر استوار کرنے کیلئے دن رات محنت کی اور اسے اس مقام پر پہنچایا۔