بنکاک: تھائی لینڈ کے مشہور جزیرے پھیچا بون میں سیاح کو ریچھ سے چھیڑ خانی مہنگی پڑ گئی۔برہم ریچھ نے اپنے نوکیلے پنجوں سے اسے نوچ کر رکھ دیا۔
تفصیلات کے مطابق ایک سیاح کو نہ جانے کیا سوجھی کہ اس نے ایک ریچھ کو چھیڑنے او راسکا مذاق اڑانے کا فیصلہ کیا جو اسے بہت مہنگا پڑا۔ 36سالہ سیاح نے ریچھ کیلئے رکھا ہوا چاول کا پیالہ اتنی اونچائی پر رکھ دیا کہ ریچھ کیلئے اس تک پہنچنا یا منہ لیجانا ناممکن ہوگیا تھا۔
ریچھ غصے میں آکر پچھلی ٹانگوں پر کھڑا ہوگیا اور نہ صرف سیاح پر حملہ کیا بلکہ اسے کھینچتے ہوئے انکلوژر تک لے گیا۔ صورتحال کافی خطرناک تھی جسے دیکھ کر لوگ ڈر گئے تاہم کچھ لوگ اس کی مدد کو دوڑے اور سیاح کو بچالیا۔ ریچھ کے حملے کے بعد سیاح بے ہوش ہوگیا تاہم اس سے قبل ریچھ اس کے بدن کے گوشت کے چیتھڑے ادھیڑ چکا تھا۔
سیاح کو بچانے میں اسکے دوستوں نے مدد کی اور ریچھ کو بھگانے کیلئے ڈنڈوں کا استعمال کیا جو زیادہ کارگر ثابت نہیں ہوا۔آخرچڑیا گھر کے عملے کے کچھ لوگ اس کی مدد کو دوڑے اور ریچھ کو کسی طرح قابو کرکے وہاں سے ہٹانے میں کامیاب رہے۔
کچھ لوگوں کا کہناہے کہ ریچھ کے غصے کی بڑی وجہ یہ ہوئی کہ اسے بھوکا رکھا جارہا تھا اور واقعہ کے دن اسے صبح سے کچھ کھانے کو نہیں ملا تھا۔
انتظامیہ کے کارکنوں نے چاول کا ایک پیالہ رکھا تو اس سیاح نے اسے اسکی پہنچ سے اتنا دور کردیا کہ وہ اپنے غصے پر قابو نہیں پاسکا۔
