زلفی بخاری اور فواد حسن فواد کا نام ای سی ایل میں شامل

زلفی بخاری اور فواد حسن فواد کا نام ای سی ایل میں شامل

فائل فوٹو

اسلام آباد: نیب کی درخواست پر زلفی بخاری اور فواد حسن فواد کا نام ای سی ایل میں ڈال دیا گیا۔

قومی احتساب بیورو (نیب) چیئرمین تحریک انصاف عمران خان کے قریبی ساتھی زلفی بخاری کی آف شور کمپنیوں کی تحقیقات کررہا ہے اوراس کے لیے ان کا نام ایگزٹ کنٹرول لسٹ (ای سی ایل) میں ڈال کر بیرون ملک جانے سے روکنے کی سفارش کی گئی تھی۔ وزارت داخلہ نے زلفی بخاری کا نام ای سی ایل میں ڈال دیا ہے، زلفی بخاری کا نام نیب کی درخواست پر کابینہ کی ذیلی کمیٹی کی منظوری کے بعد ای سی ایل میں ڈالا گیا ہے۔

دوسری جانب سابق وزرائے اعظم نوازشریف اور شاہد خاقان عباسی کے سابق پرنسپل سیکریٹری فواد حسن فواد کا نام بھی ای سی ایل میں ڈال دیا گیا ہے۔ذرائع کے مطابق فواد حسن فواد کا نام نیب کی درخواست پر ای سی ایل میں ڈالا گیا ہے جس کی کابینہ کی ذیلی کمیٹی نے منظوری دی تھی۔واضح رہےکہ نیب فواد حسن فواد کے خلاف آشیانہ اقبال ہاؤسنگ اسکیم میں اختیارات کے ناجائز استعمال اور بدعنوانی کی تحقیقات کررہا ہے جب کہ فواد حسن فواد کو 5 جولائی کو نیب لاہور نے بیان ریکارڈ کرانے کے بعد گرفتار کیا تھا۔