سابق صدر آصف زرداری کیخلاف سوئس مقدمات دوبارہ نہیں کھولے جا سکتے: نیب

سابق صدر آصف زرداری کیخلاف سوئس مقدمات دوبارہ نہیں کھولے جا سکتے: نیب
فوٹو فائل

اسلام آباد: نیب کی جانب سے جاری بیان میں کہا گیا ہے کہ سابق صدر آصف زرداری کے خلاف سوئس کیسز دوبارہ نہیں کھل سکتے۔نیب نے این آر او کیس سے متعلق اپنا جواب سپریم کورٹ میں جواب جمع کرا دیا ہے جس میں کہا گیا ہے کہ آصف علی زرداری کے خلاف سوئس مقدمات کو دوبارہ نہیں کھولا جا سکتا۔


قومی احتساب بیورو (نیب) نے قومی مصالحتی آرڈیننس (این آر او) کیس میں سپریم کورٹ آف پاکستان میں اپنا جواب جمع کرا دیا ہے جس میں کہا گیا ہے کہ سابق صدر آصف علی زرداری کے خلاف سوئس مقدمات دوبارہ نہیں کھل سکتے کیونکہ حکومت کی جانب سے مقررہ وقت میں اپیل دائر نہیں کی گئی۔

یہ بھی پڑھیں:پنجاب کا ایسا وزیراعلیٰ لاؤں گا جس پر کرپشن کا کوئی الزام نہیں ہوگا، عمران خان

   

نیب نے اپنے جواب میں کہا کہ سوئٹزرلینڈ حکومت نے آصف زرداری کیخلاف مقدمات کھولنے کی اپیل مسترد کی کیونکہ پاکستان کی اپیل زائد المیعاد ہو چکی تھی جس کے بعد ستمبر 2012ء میں نیب نے انکوائری بند کر دی۔ نیب نے کہا کہ آصف زرداری کیخلاف زیرِ التوا مقدمات کی تفصیلات لف ہیں، قومی ادارہ سپریم کورٹ کے حکم پر عملدرآمد کرے گا۔

یہ بھی پڑھیں:عیدالاضحیٰ کی چھٹیوں کی سمری وزارت داخلہ کو ارسال

   

سپریم کورٹ میں جمع کرائی گئی رپورٹ میں کہا گیا ہے کہ این آر او سے مالی نقصان کے حوالے سے کوئی ریکارڈ نہیں اور نہ ہی ملکی خزانے کو نقصان کا اصل تخمینہ موجود ہے، اس حوالے سے ابھی مکمل تفصیلات جمع کی جا رہی ہیں۔نیب کے جواب میں کہا گیا ہے کہ سابق اٹارنی جنرل ملک محمد قیوم کیخلاف تحقیقات کی گئیں لیکن ان پر اختیارات کا ناجائز استعمال ثابت نہیں ہوا۔

یہ بھی پڑھیں:پاکستان کیلیے تحریک پاکستان والا جذبہ درکار ہے ،شاہ محمود قریشی

   

یاد رہے کہ سپریم کورٹ میں قومی مصالحتی آرڈیننس سے متعلق درخواست دائر کی گئی تھی جس میں موقف اختیار کیا گیا تھا کہ این آر او کی وجہ سے ملک کا اربوں کا نقصان ہوا، قانون بنانے والوں سے رقم وصول کی جائے۔سابق صدر پرویز مشرف نے 5 اکتوبر 2007ء کو قومی مفاہمتی آرڈیننس (این آر او) جاری کیا تھا جس کے تحت 8 ہزار سے زائد مقدمات ختم کیے گئے تھے۔ این آر او کو 16 دسمبر 2009ء کو سپریم کورٹ کے 17 رکنی بنچ نے کالعدم قرار دیا اور اس قانون کے تحت ختم کیے گئے مقدمات بحال کرنے کے احکامات جاری ہوئے۔

این آر او سے فائدہ اٹھانے والوں میں نامی گرامی سیاستدان شامل ہیں جب کہ اسی قانون کے تحت سابق وزیراعظم بے نظیر بھٹو شہید کی واپسی بھی ممکن ہوسکی تھی۔

نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں