ڈینگی بے قابو ہونے لگا، خیبرپختونخواہ میں سب سے زیادہ مریض سامنے آ گئے

پشاور: خیبر پختونخوا میں حالیہ بارشوں کے باعث پشاور اورمضافاتی علاقوں میں ڈینگی وائرس پھیلنے لگا ہے اور پشاور سمیت 26 اضلاع میں وائرس کے پھیلاؤ تصدیق بھی ہو گئی ہے جبکہ اب تک ایک ہزار سے زائد کیس سامنے آ چکے ہیں۔ 
تفصیلات کے مطابق خیبر پختونخوا میں حالیہ بارشوں سے صوبے بھر میں ڈینگی کے درجنوں کیس سامنے آئے ہیں اور پشاور سمیت 26 اضلاع میں تصدیق بھی ہوگئی ہے۔ مردان میں سب سے زیادہ 600 افراد میں ڈینگی وائرس کی تصدیق ہوئی اور پشاور میں بھی ایک ہفتے کے دوران 100سے زائد کیس رپورٹ ہوئے ہیں۔ 
محکمہ صحت کی جانب سے جاری کی گئی رپورٹ میں بتایا گیا ہے کہ صوبے میں ڈینگی وائرس کے کیسز کی تعداد میں اضافہ ہو رہا ہے اور صوبے میں متاثرہ کیسوں کی تعداد ایک ہزار 633 تک پہنچ گئی ہے، خیبر میں 349 کیسز سامنے آئے ہیں اور صوبے کے عوام ڈینگی وائرس کے بڑھتے ہوئے کیسز سے پریشان ہو گئے ہیں۔ 
رپورٹ کے مطابق ضلع ہری پور سے 170، نوشہرہ سے 165 کیس سامنے آ چکے ہیں، پشاور سے ایک ہفتے کے دوران 105 کیس رپورٹ ہوئے، ڈیرہ اسماعیل خان سے 59، چارسدہ 49، مانسہرہ 29، بنوں 12، ایبٹ آباد سے11 اور باجوڑ سے 6 کیس سامنے آئے ہیں۔ 
دوسری جانب سندھ میں بھی ڈینگی دوبارہ بے قابو ہونے لگا اور کراچی میں 24 گھنٹے کے دوران مزید 84 کیسز رپورٹ ہوئے ہیں، سیلاب اور بارش کے باعث جگہ جگہ کھڑے پانی سے ڈینگی کیسوں میں مزید اضافہ کے خدشات بھی ظاہر کئے جا رہے ہیں۔