کوئٹہ : : نواب ثنا اللہ زہری نے وزیر اعلیٰ بلوچستان کے عہدے سے استعفیٰ دے دیا۔ سابق وزیر داخلہ سرفراز بگٹی نے ٹوئیٹ کر کے اس بات کی تصدیق کر دی۔ وزیر اعلیٰ بلوچستان تحریک عدم اعتماد سے پہلے ہی مستعفی ہوگئے ہیں۔
85cbdf0a58702b70e153db484419a1fd
ذرائع کے مطابق وزیر اعظم شاہد خاقان عباسی نے کوئٹہ کا دورہ کیا اور ناراض ارکان کو منانے کی کوششیں کیں تاہم مسلم لیگ ن کے ارکان نے ان سے ملاقات سے بھی انکار کردیا۔
مسلم لیگ ن کے ناراض ارکان نے وزیر اعظم کو پیغام بھجوایا کہ ایک ایسے وقت میں جب وہ تحریک عدم اعتماد پیش کرچکے ہیں ایسے میں ان سے ملاقات کرنا مناسب نہیں ہوگا۔ وزیر اعظم شاہد خاقان عباسی نے سیاسی صورتحال کا جائزہ لینے کے بعد نواب ثنا اللہ زہری کو مستعفی ہونے کا مشورہ دے دیا اور کہا کہ جب اپنے ارکان ہی ساتھ نہیں ہیں تو حکومت بچانے کا کوئی فائدہ نہیں ہے۔
دوسری جانب ترجمان وزیراعلیٰ بلوچستان جان اچکزئی نے کہا کہ وزیراعظم کی جانب سے وزیراعلیٰ کو مستعفی ہونے کی کوئی ہدایت نہیں کی گئی جب کہ نواب ثناءاللہ زہری نے مستعفی نہ ہونے کا فیصلہ کیا ہے اور وہ عدم اعتماد کی تحریک کا سامنا کریں گے۔وزیراعلیٰ بلوچستان کے ترجمان کا مزید کہنا تھا کہ ہمارے پاس اکثریت ہے جو اسمبلی میں ثابت کریں گے۔
