فیصل آباد: اپوزیشن لیڈر قومی اسمبلی خورشید شاہ نے کہا ہے کہ چوتھی شادی عمران خان کا حق ہے، درخواست کرتا ہوں کہ جو بھی شادی کریں اسے سنبھال بھی لیں،ن لیگ کا بلوچستان میں نہ پہلے کوئی مقام تھا اور نہ ہی اب ہے، نجومیوں پر کوئی اعتبار نہیں ، آئندہ الیکشن اپنے وقت پر ہوتے نظر آرہے ہیں، تحریک عدل چلا نا نواز شریف کا حق ہے لیکن اس کے نتائج کا بھی انتظار کریں۔
میڈیا سے گفتگو کرتے ہوئے خورشید شاہ نے کہا کہ چوتھی شادی بھی عمران خان کا حق ہے، چیئرمین تحریک انصاف سے درخواست کرتا ہوں کہ جو بھی شادی کریں اسے سنبھال بھی لیں۔خورشید شاہ نے کہا کہ ختم نبوت کے معاملے پر پیپلز پارٹی بڑا واضح موقف رکھتی ہے، ہم ختم نبوت کو سیاست کے لیے نہیں صرف مذہب کے لیے استعمال کرتے ہیں۔اپوزیشن لیڈر نے کہا کہ ہماری جماعت پی ٹی آئی کے ساتھ تو نہیں البتہ سانحہ ماڈل ٹا ئو ن کے انصاف سے الحاق ضرور ہے ۔آئندہ انتخابات کے حوالے سے خورشید شاہ نے کہا کہ میں نجومیوں پر کوئی اعتبار نہیں کرتا مگر مجھے آئندہ الیکشن اپنے وقت پر ہوتے نظر آرہے ہیں۔
انہوں نے کہا نواز شریف کا حق ہے کہ وہ تحریک عدل چلائیں لیکن اس کے نتائج کا بھی انتظار کریں۔خارجہ پالیسی کے حوالے سے اپوزیشن لیڈر نے کہا کہ ہم آزاد خارجہ پالیسی چاہتے ہیں، کسی سے بگاڑ نہیں، حکومت نے چارسال ضائع کرنے کے بعد وزیرخارجہ رکھا ہے ، ساتھ ہی انہوں نے واضح کیا کہ ہمیں کوئی ڈکٹیٹ نہ کرے۔خورشید شاہ نے کہا ہ جنگیں امریکا کی پیداوار ہیں،امریکا سے پاکستان کی ترقی برداشت نہیں ہوتی اس وقت واشنگٹن میں بھی ایک لابی موجود ہے جو ٹرمپ سے اختلاف کرتی ہے۔
