چیئرمین نیب نے ڈی جی لاہور شہزاد سلیم کی میڈیا گفتگو کا نوٹس لے لیا

چیئرمین نیب نے ڈی جی لاہور شہزاد سلیم کی میڈیا گفتگو کا نوٹس لے لیا

لاہور: چیئرمین نیب جسٹس (ر) جاوید اقبال نے ڈی جی نیب لاہور شہزاد سلیم کی نجی ٹی وی سے گفتگو کا نوٹس لیتے ہوئے ریکارڈ طلب کرلیا ہے۔


تفصیلات کے مطابق نیب کی جانب سے جاری بیان کے مطابق قومی احتساب بیورو کے چیئرمین جسٹس (ر) جاوید اقبال نے ڈی جی نیب لاہور شہزاد سلیم کی نجی ٹی وی چینل سے گفتگو کا سارا ریکارڈ پیمرا سے طلب کرلیا ہے۔

بیان میں مزید کہا گیا ہے کہ نیب تمام اراکین اسمبلی کا احترام کرتا ہے جب کہ ریکارڈ اس لیے طلب کیا گیا ہے تاکہ دیکھا جاسکے کہ کیا نجی ٹی وی سے گفتگو میں حقائق کے برعکس کوئی بات کی گئی اور نیب لاہور کے سربراہ کی گفتگو سے معزز اراکین اسمبلی کا استحقاق مجروح ہوا تو کس طرح ہوا۔

واضح رہے کہ گزشتہ روز نیب لاہور کے سربراہ شہزاد سلیم نے نجی ٹی وی سے گفتگو میں شہباز شریف کے خلاف نیب کیسز پر بات کی تھی۔