بھارت نے افغان شہر مزار شریف میں بھی قونصل خانہ بند کردیا

بھارت نے افغان شہر مزار شریف میں بھی قونصل خانہ بند کردیا
سورس: file photo

کابل : بھارت نے قندھار کے بعد افغان شہر مزار شریف میں بھی قونصل خانہ بند کردیا ۔ حکام نے عملے اور شہریوں کو فوری طورپر واپسی کی ہدایت کردی ۔

افغانستان کے صوبہ بلخ کے دارالحکومت مزار شریف میں قائم بھارتی قونصل نے آفیشل ٹوئٹر اکاؤنٹ سے شہریوں کیلئے ہدایت جاری کی۔

 ٹوئٹ میں شہریوں کو ہدایت کی گئی کہ مزارشریف اور اردگرد تمام بھارتی شہری علاقہ چھوڑ دیں جبکہ  آج شام دہلی کیلئے خصوصی پرواز مزار شریف سے روانہ ہوگی۔

 قونصلیٹ نے خصوصی پرواز سے روانگی کیلئے بھارتی شہریوں سے نام اور پاسپورٹ نمبر واٹس ایپ کرنے کی اپیل کی۔ 

اس کے علاوہ قونصلیٹ نے سفارتی اور سکیورٹی عملے کو بھی نکالنے کا اعلان کیا ہے۔

بھارتی میڈیا رپورٹس میں کہا گیا ہے کہ بھارتی جہاز عملے اور شہریوں کو لیکر مزار شریف سے براہ راست دہلی جائے گا۔

دوسری جانب بھارتی میڈیا رپورٹس کے مطابق قندھار کے بعد مزار شریف میں بھی قونصل خانہ خالی کرنے کے بعد عارضی طور پر بند کردیا گیا ہے۔

خیال رہے کہ اس سے قبل قندھار میں بھی بھارتی قونصل خانے کو بند کردیا گیا تھا۔