کورونا کے بڑھتے وار،شادی ہالز میں تقریب کا دورانیہ 2 گھنٹے، مہمانوں کی تعداد محدود کرنے کا فیصلہ

کورونا کے بڑھتے وار،شادی ہالز میں تقریب کا دورانیہ 2 گھنٹے، مہمانوں کی تعداد محدود کرنے کا فیصلہ

اسلام آباد:کورونا وائرس کے بڑھنے کے خطرے کے پیش نظر شادی ہالز میں تقریب کے دورانیے کو 2گھنٹے اور مہمانوں کی تعداد کو محدود کرنے کا فیصلہ کرلیا گیا ہے۔

نیشنل کمانڈ اینڈ آپریشن سینٹر (این سی او سی) نے کورونا کا پھیلائوروکنے شادی ہالز کیلئے ضابطہ کار (ایس او پیز) جاری کردیے۔

گزشتہ دنوں این سی او سی نے شادی ہالز میں تقریبات کے باعث کورونا پھیلنے پر تشویش کا اظہار کیا تھا جس کے بعد اب کورونا کی روک تھام کیلئے ضابطہ کار  جاری کیے گئے ہیں۔

این سی او سی کے مطابق کورونا وائرس سے بچائؤ کیلئے حفاظتی اقدامات پر عملدرآمد ضروری ہے، شادی ہالز میں ہر تقریب کا دورانیہ 2 گھنٹے ہوگا اور رات 10 بجے کے بعد تقریب کی اجازت نہیں ہوگی۔

اس کےعلاوہ اِن ڈور اجتماعات میں 300 جب کہ آؤٹ ڈور میں 500 افراد کی شرکت کی اجازت ہوگی اور ضابطہ کار کی خلاف ورزی پر متعلقہ شادی ہال کو بند کردیا جائے گا۔

ملک میں کورونا سے آج مزید 8 افراد انتقال کرگئے ہیں جبکہ  مزید 661 افراد میں کورونا کی تصدیق ہوئی ہے۔

خیال رہے کہ ملک میں کورونا کیسز میں کمی کے بعد  ستمبر سے شادی ہالز کھولے گئے تھے تاہم ضابطہ کار کی خلاف ورزی پر کراچی سمیت دیگر شہروں میں کئی ہالز کو بند کردیا گیا ہے۔