لاہور: ڈومیسٹک کرکٹ میں رنز کے ڈھیر لگانے کے باوجود سلیکٹرز کی ستم ظریقی کا شکار فواد عالم نے ایک مرتبہ پھر حکام بالا کو آئینہ دکھاتے ہوئے 32 سال کی عمر میں یویو ٹیسٹ میں 19 کا متاثر کن اسکور حاصل کر کے سب کو حیران کردیا۔
آئندہ ماہ قومی ٹیم کے دورہ آئرلینڈ اور انگلینڈ کے لیے آج نیشنل کرکٹ اکیڈمی میں متعدد کھلاڑیوں کے فٹنس ٹیسٹ لیے گئے۔ڈومیسٹک کرکٹ خصوصاً قائد اعظم ٹرافی میں شاندار کارکردگی دکھانے والے فواد عالم کا قومی ٹیم سے مستقل اخراج کسی معمے سے کم نہیں اور انہوں نے آخری مرتبہ 2015 میں قومی ٹیم کی نمائندگی کی تھی۔
یہ بھی پڑھیں:فواد عالم کی قومی ٹیم میں شمولیت کے حوالے سے بڑی خبر آ گئی
دورہ انگلینڈ کے لیے جن کھلاڑیوں کو فٹنس ٹیسٹ کے لیے طلب کیا گیا ان میں فواد عالم کا نام بھی شامل ہے اور پیر کو لیے گئے فٹنس ٹیسٹ میچ میں انہوں نے شاندار کارکردگی کا مظاہرہ کرتے ہوئے 19 نمبر لے کر سلیکٹرز کے لیے وہ تمام عذر ختم کر دیے ہیں جو ان کے ٹیم سے اخراج کا سبب بن سکتے ہیں۔فواد عالم نے اپنی عمدہ کارکردگی سے اپنے سے کم عمر نوجوانوں حسن علی، بابر اعظم اور فخر زمان کے سر بھی شرم سے جھکا دیے جو 18پوائنٹس حاصل کر سکے۔ان کے مقابلے میں کپتان سرفراز احمد نے 17.4 اسکور کیا جبکہ 25سالہ نوجوان وکٹ کیپر بلے باز محمد رضوان 21 اسکور کے ساتھ سرفہرست رہے اور اسد شفیق کا 20 اسکور کے ساتھ دوسرا نمبر رہا۔
یہ بھی پڑھیں:فواد عالم نے کراچی وائٹس کو قومی ون ڈے ریجنزکپ جتوا دیا
فواد عالم نے گزشتہ ڈومیسٹک سیزن کے 10 فرسٹ کلاس میچوں میں 40.71 کی اوسط سے 570 رنز اسکور کیے تھے۔
نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں
