اس سال ملک میں رمضان اور عید ایک ہی دن منانے کا اعلان کریں گے، طاہر اشرفی

اس سال ملک میں رمضان اور عید ایک ہی دن منانے کا اعلان کریں گے، طاہر اشرفی
کیپشن:   اس سال ملک میں رمضان اور عید ایک ہی دن منانے کا اعلان کریں گے، طاہر اشرفی سورس:   فوٹو/سوشل میڈیا

اسلام آباد: وزیراعظم کے نمائندہ خصوصی برائے مذہبی ہم آہنگی حافظ طاہر اشرفی کا کہنا ہے کہ اس سال پورے پاکستان میں ایک ہی دن رمضان المبارک اور ایک ہی دن عید منانے کا اعلان کریں گے۔

تفصیلات کے مطابق حافظ طاہر اشرفی کا پریس کانفرنس کرتے ہوئے کہنا تھا کہ ملک میں کہیں بھی مساجد یا مدارس کی رجسٹریشن منسوخ نہیں کی گئی، حکومت کسی مدرسے یا مسجد پر قبضہ نہیں کر رہی بلکہ آج مدرسہ اور مسجد پہلے سے زیادہ محفوظ ہے۔

ان کا کہنا تھا کہ مسجد میں فاصلہ تقریب ہر جگہ موجود ہے، رمضان المبارک میں بھی احتیاطی تدابیر کا خیال رکھا جائے، گزشتہ سال کی کورونا ایس او پیز پر اس بار بھی عمل درآمد ہو گا، عبادت اور احتیاط ساتھ ساتھ ہونی چاہیے۔

انہوں نے کہا کہ پورے ملک کی مساجد اور مدارس میں ایس او پیز پر عمل ہو رہا ہے، پاکستان میں کسی مسجد یا مدرسے کو بند نہیں کیا جائے گا۔

ایک سوال کے جواب میں وزیراعظم کے نمائندہ خصوصی کا کہنا تھا کہ رویت ہلال کمیٹی کا اجلاس اس بار پشاور میں ہو رہا ہے اور رویت پر اتفاق کے لیے اجلاس پشاور میں بلایا گیا ہے جبکہ اس بار ایک ہی دن رمضان اور ایک ہی دن عید کا اعلان کریں گے۔ 

دوسری جانب محکمہ موسمیات کے مطابق لاہور شہر میں 13 اپریل کو مطلع صاف رہے گا۔ محکمہ موسمیات کا کہنا ہے کہ رمضان المبارک کے دوران تیز ہوائیں چلنے کا بھی امکان ہے۔