'اورنج لائن منصوبے پر اب تک ایک ارب 22 کروڑ ڈالر خرچ ہو چکے ہیں'

'اورنج لائن منصوبے پر اب تک ایک ارب 22 کروڑ ڈالر خرچ ہو چکے ہیں'
اورنج لائن ٹرین منصوبے کے لیے ایک ہزار 65 کنال اراضی ایکوائر کی گئی۔۔۔۔۔۔فائل فوٹو

لاہور: اورنج لائن ٹرین منصوبے پر لاگت کی تفصیلات پنجاب اسمبلی میں پیش کردی گئیں۔ رپورٹ کے مطابق منصوبے پر اب تک ایک ارب 22 کروڑ ڈالر کی رقم خرچ ہوچکی ہے، منصوبہ رواں سال 30 جولائی تک مکمل ہوجائے گا۔


رپورٹ میں بتایا گیا ہےکہ اورنج لائن منصوبے کی تعمیرکے دوران 14 انسانی جانیں ضائع ہوچکی ہیں، جاں بحق افراد کے لواحقین کو فی کس 21 لاکھ 78 ہزار روپے ادا کیے گئے ہیں۔

رپورٹ کے مطابق اورنج لائن ٹرین منصوبے کے لیے ایک ہزار 65 کنال رقبہ اراضی ایکوائر کی گئی۔

اورنج لائن ٹرین کا روٹ ٹھوکر نیاز بیگ سے براستہ چوبرجی ریلوے اسٹیشن، جی ٹی روڈ ،قائد اعظم انٹر چینج تک ہوگا، روٹ کا فاصلہ 27 کلومیٹر ہو گا اور 24 کلومیٹر ایلی ویٹیڈ، 2 کلومیٹر انڈر گراؤنڈ ہو گا۔

خیال رہے کہ اورنج لائن ٹرین کا منصوبہ مسلم لیگ (ن) کے گزشتہ دورِ حکومت میں سابق وزیر اعلیٰ پنجاب شہبا زشریف نے شروع کیا جس کا کل تخمینہ ایک کھرب 65 ارب روپے لگایا گیا تھا تاہم منصوبے میں رکاوٹوں کے باعث یہ تاخیر کا شکار ہو گیا اور اس کی لاگت میں بھی اضافہ ہوا ہے۔