سندھ میں گندم کی خریداری کاہدف 12لاکھ ٹن مقرر

سندھ میں گندم کی خریداری کاہدف 12لاکھ ٹن مقرر

کراچی: سندھ میں گندم کی نئی فصل کی سرکاری خریداری15 مارچ سے شروع ہو جائے گی، اس سال بھی گندم کا سرکاری ریٹ 1300 روپے فی من( 40 کلوگرام) برقرار رکھا گیا ہے۔ اس سال 12 لاکھ ٹن گندم کی خریداری کا ہدف مقرر کیا گیا ہے۔سندھ میں اس سال11لاکھ 66 ہزارہیکٹرز پر گندم کی فصل کاشت کی گئی ہے۔ ڈگری سب ڈویڑن سمیت میرپورخاص ڈویڑن میں گزشتہ ماہ فروری کے آخری ہفتے سے گندم کی نئی فصل تیار ہو چکی ،جبکہ سندھ کے دیگر اضلاع میں بھی تقریبا گندم کی نئی فصل تیار ہو چکی ہے۔محکمہ خوراک کی جانب سے تاحال گندم کی سرکاری خریداری کے مراکز قائم نہیں کئے جا سکے ہیں،جس کے باعث چھوٹے آباد گارکم ریٹ پر اپنی فصل فروخت کرنے پر مجبور ہو رہے ہیں۔


اس سلسلے میں سندھ آباد گار بورڈ نے گندم کے آباد گاروں کے اس اہم مسئلے پر 13 مارچ کو آبادگاروں کا اجلاس بھی طلب کر لیا ہے۔چیمبر آف ایگر یکلچر کے رہنماوں نے بھی سرکاری خریداری مراکز نہ کھولنے پر شدید احتجاج کیا ہے۔ معلوم ہوا ہے کہ محکمہ خوراک نے صوبے میں 15 مارچ سے گندم کی سرکاری خریداری شروع کرنے کا فیصلہ کیا ہے۔ اور اس سال گندم کی سرکاری خریداری کا ہدف 12 لاکھ ٹن( ایک کروڑ 20 لاکھ بوری) مقرر کیا ہے۔گزشتہ سال 11 لاکھ ٹن گندم کی خریداری کی گئی تھی۔

نیوویب ڈیسک< News Source