اسلام آباد: وفاقی وزیر توانائی حماد اظہر نے بجلی کی قیمتوں میں اضافے کی خبروں کی تردید کرتے ہوئے خوشخبری سنائی ہے کہ بجلی صارفین کو مارچ کے بلوں میں 5روپے فی یونٹ ریلیف ملنا شروع ہو جائے گا۔
تفصیلات کے مطابق حماد اظہر نے کہا کہ یہ ریلیف وزیراعظم پاکستان عمران خان کے اعلان کردہ پیکیج کے تحت دیا جائے گا اور اس حوالے سے بجلی کی تقسیم کار کمپنیوں کو ہدایات جاری کر دی گئی ہیں۔ اس پیکیج سے ملک بھر کے گھریلوں صارفین کے علاوہ کمرشل صارفین بھی مستفید ہو سکیں گے۔
انہوں نے سماجی رابطوں کی ویب سائٹ پر جاری پیغام میں لکھا ’بجلی کے نرخ میں اضافہ نہیں ہوا، عالمی منڈیوں میں کوئلے، ایل این جی اور تیل کی قیمتوں کے اضافے کی وجہ سے ہر ماہ نئی فیول کاسٹ ایڈجسٹمنٹ بل میں لگتی ہے اور پچھلے ماہ کی خارج ہو جاتی ہے۔ یاد رہے کہ وزیراعظم کا 5 روپے فی یونٹ رعایتی پیکیج کا نفاظ ہو چکا ہے۔‘
بجلی کے نرخ میں آضافہ نہیں ہوا۔ عالمی منڈیوں میں کوئلے، LNG اور تیل کی قیمتوں کے اضافے کی وجہ سے ہر ماہ نئی فیول کاسٹ ایڈجسمنٹ بل میں لگتی ہے اور پچھلے ماہ کی خارج ہو جاتی ہے۔
یاد رہے کہ وزیراعظم کا 5 روپے فی یونٹ رعایتی پیکج کا نفاظ ہو چکا ہے۔
— Hammad Azhar (@Hammad_Azhar) March 11, 2022
واضح رہے کہ گزشتہ دنوں وزیراعظم عمران خان نے اپنے خطاب میں پٹرول اور بجلی کی قیمتیں کم کرنے کا اعلان کیا تھا اور کہا تھا کہ آئندہ بجٹ تک قیمتوں میں اضافہ نہیں کیا جائے گا۔
