حکومت نے فی حاجی 45 ہزار روپے سبسڈی دینے پر غور شروع کر دیا

حکومت نے فی حاجی 45 ہزار روپے سبسڈی دینے پر غور شروع کر دیا
وزارت مذہبی امور اور وزارت خزانہ کے درمیان حج سبسڈی کے معاملے پر مشاورت ہو گی۔۔۔۔۔۔فائل فوٹو

اسلام آباد: ڈالر کی بڑھتی قدر کے باعث حج مہنگا ہونے کا امکان ہے جس پر عازمین حج کے ساتھ ساتھ حکومت بھی پریشان ہے۔ طویل مشاورت کے بعد حکومت نے حج سبسڈی دینے پر غور شروع کر دیا ہے۔


وزارت مذہبی امور نے حج پر سبسڈی دینے سے متعلق تجاویز تیار کرتے ہوئے فی حاجی 45 ہزار روپے سبسڈی دینے کی سفارش کی ہے۔ وزارت مذہبی امور اور وزارت خزانہ کے درمیان حج سبسڈی کے معاملے پر مشاورت ہو گی۔

وزیر مذہبی امور نور الحق قادری اور وزیر خزانہ اسد عمر کے درمیان ملاقات آئندہ ہفتے ہو گی جس میں مشاورت کے بعد حج پالیسی کو حتمی شکل دی جائے گی۔ اگر حج پر سبسڈی منظور نہ ہوئی تو سرکاری حج کا خرچہ 4 لاکھ 20 ہزار فی عازم سے بھی تجاوز کر سکتا ہے۔

خیال رہے کہ عازمین حج کو گزشتہ سال بھی ن لیگ کی حکومت نے خصوصی گرانٹ دی تھی۔