موٹروے زیادتی کیس، مرکزی ملزم کی شناخت ہو گئی، پولیس ذرائع

 موٹروے زیادتی کیس، مرکزی ملزم کی شناخت ہو گئی، پولیس ذرائع
کیپشن:   ملزم کی گرفتاری کیلئے سی ٹی ڈی کی ٹیمیں چھاپے مار رہی ہیں، پولیس ذرائع

لاہور: لاہور موٹروے زیادتی کیس میں بڑی پیشرفت ہو گئی، مرکزی ملزم کا ڈین اے میچ ہو گیا اور ملزم کی شناخت عابد علی کے نام سے کرلی گئی ہے۔

پولیس ذرائع کے مطابق ملزم کا پہلے ہی کریمنل ریکارڈ موجود ہے اور ملزم کا ڈی این اے 2013 کے ڈیٹا بیس سے میچ ہوا۔ خاتون کے لباس سے ڈی این اے میچ ہوا، ملزم عابد ملہی فورٹ عباس کا رہائشی ہے۔ متاثرہ خاتون کے نمونے کریمنل ڈیٹا بیس سے میچ ہوئے اور کریمنل ڈیٹا بیس میں ملزم عابد ملہی 2013 سے موجود ہے۔ ملزم عابد ملہی کو تاحال گرفتار نہیں کیا گیا جبکہ ملزم کی گرفتاری کیلئے سی ٹی ڈی کی ٹیمیں چھاپے مار رہی ہیں۔

وزیراعلیٰ کی زیر صدارت موٹروے واقعہ کی تحقیقاتی کمیٹی کا اجلاس ہوا جس میں عثمان بزدار نے کمیٹی کو تحقیقات جلد مکمل کرنے کی ہدایت کر دی گئی۔ وزیراعلیٰ پنجاب کا کہنا تھا موٹر وے پولیس کی تعیناتی تک پنجاب پولیس فرائض سرانجام دے گی، دلخراش واقعہ میں ملوث ملزمان سزا سے نہیں بچ پائیں گے۔

عثمان بزدار نے کہا ہے کہ متاثرہ خاندان کو انصاف کی فراہمی تک چین سے نہیں بیٹھوں گا، پنجاب حکومت اور پوری قوم متاثرہ خاندان کے ساتھ ہے، متاثرہ خاتون کو فوری انصاف دلانا ریاست کی ذمہ داری ہے۔