ممبئی:بالی ووڈ اسٹار شاہ رخ خان اور دپیکا پڈوکون نے کئی فلموں میں کام کیا جب کہ دونوں اداکاروں کی جوڑی ایک اور فلم میں 3 سال بعد ساتھ نظر آنے والی تھی لیکن اب ڈمپل گرل نے فلم میں کام کرنے سے انکار کردیا ہے۔
شاہ رخ اور دپیکا نے ہدایتکار آنند ایل رائے کی فلم سائن کرلی تھی جس کی شوٹنگ رواں سال شروع ہونا تھی لیکن اب ڈمپل گرل نے فلمی مصروفیات کے باعث کام کرنے سے انکار کردیا ہے۔ دپیکا نے سنجے لیلا بھنسالی کی فلم ’’پدماوتی‘‘ کی شوٹنگ کے لیے فلم میں کام سے انکار کیا جس پر آنند ایل رائے بھی پریشان ہیں اور جلد ہی دپیکا سے بات چیت کا ارادہ رکھتے ہیں۔
شاہ رخ خان نے ہی اپنی فلم’’اوم شانتی اوم‘‘ سے دپیکا کو بالی ووڈ میں متعارف کرایا تھا جس کے بعد دونوں کی جوڑی نے ’’چنائی ایکسپریس‘‘ اور’’ہیپی نیو ایئر‘‘ میں جلوہ گر ہوئے تھے۔
