جرمنی میں موجود طیارہ اب بھی پی آئی اے کی ملکیت ہے، ترجمان

جرمنی میں موجود طیارہ اب بھی پی آئی اے کی ملکیت ہے، ترجمان

کراچی: جرمنی میں موجود طیارہ اب بھی پی آئی اے کی ملکیت ہے جب کہ اے تھری ٹین ماڈل کا طیارہ ایف آئی اے کے زیر تفتیش ہے۔ ترجمان پی آئی اے کا کہنا ہے کہ جرمنی میں موجود طیارہ کسی میوزیم کو فروخت نہیں کیا گیا یہ اب بھی پی آئی اے کی ملکیت ہے۔ کچھ قانونی تقاضے ہیں جس کے بعد معاملے کا تصفیہ کر لیا جائے گا۔


میڈیا رپورٹس کے مطابق پی آئی اے کا جرمنی میں موجود طیارہ گراؤنڈ کرکے فضائی بیڑے سے باہر کر دیا گیا تھا۔ مذکورہ اور 4 دیگر طیاروں پر پی آئی انتظامیہ نے رپورٹ دی تھی کہ اڑان کے قابل نہیں جب کہ ائیر بس 310 طیارہ سابق جرمن نژاد سی ای او برن ہلڈن برانڈ کی ہدایات پر جرمنی پہنچایا گیا تھا۔

رپورٹس کے مطابق جرمن میوزیم میں طیارے کا رنگ تبدیل کرنے کا کام شروع کیا گیا جب کہ ایک اسرائیلی فلم میں پی آئی اے کے طیارے کی عکس بندی کا معاملہ بھی منظر عام پر آیا۔ طیارہ بیرون ملک فروخت کرنے کے معاملے پر برن ہلڈن برانڈ کے خلاف تحقیقات شروع کی گئیں۔

قومی ائیر لائن کے جرمن نژاد سی ای او پر طیارہ سستے داموں فروخت کرنے سمیت دیگرمتفرق الزاما ت بھی تھے۔ مسلسل تنازعات کے بعد برن ہلڈ ن برانڈ کو پی آئی اے سے فارغ کر دیا گیا اور ان کا نام ای سی ایل میں بھی ڈالا گیا۔ ای سی ایل سے نام خارج ہونے کے بعد جرمن سی ای او واپس اپنے ملک چلے گئے۔ ایف آئی اے جرمنی کے میوزیم کو طیارہ سونپنے کے معاملے کی تحقیقات کر رہی ہے۔ ائیر بس 310 طیارہ اس وقت جرمنی کے شہر لپ زیگ میں موجود ہے۔

 

نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں