کراچی:پاکستان کے سابق صدر اور پیپلز پارٹی کے شریک چیئرمین آصف علی زرداری اور ان کی ہمشیرہ فریال تالپور کی منی لانڈرنگ سکینڈل میں عبوری ضمانت میں 5 مارچ تک کی توسیع کردی گئی ہے ۔
تفصیلات کے مطابق سابق صدر اور ان کی بہن آج بینکنگ کورٹ میں پیش ہوئے جبکہ اس موقع پر سکیورٹی کے سخت انتظامات کئے گئے۔
ایف آئی اے پراسیکیوٹر نے کہا سپریم کورٹ کا فیصلہ پڑھ لیا جائے، عدالت ملزمان کی ضمانتیں سننے کی گنجائش نہیں رکھتی۔ وکیل فاروق نائیک نے کہا قانون ملزمان کی ضمانتیں سننے پر کوئی قدغن نہیں لگاتا۔
خیال رہے کہ میگا منی لانڈرنگ کیس میں سابق صدر آصف زرداری، فریال تالپور، انور مجید، عبدالغنی مجید، حسین لوائی اور دیگر نامزد ہیں۔
اربوں روپے کی منی لانڈرنگ کیس میں آصف زرداری، فرالی تالپور، انور مجید کے بیٹے نمر مجید، ذوالقرنین، علی مجید عبوری ضمانت پر ہیں جبکہ انور مجید، عبدالغنی مجید، حسین لوائی، طحہ رضا گرفتار ہیں۔
