اسلام آباد : پاکستانی پاسپورٹ کو دنیا کا 9 واں بدترین پاسپورٹ قرار دیا گیا ہے۔بین الاقوامی فرم نے متحدہ عرب امارات کے پاسپورٹ کو عرب دنیا کا بہترین پاسپورٹ قرار دیا ہے، امارات کا پاسپورٹ بین الاقوامی رینکنگ میں 38 ویں نمبر پر ہے جبکہ دنیا کا بہترین پاسپورٹ یورپی ملک لکسمبرگ کا ہے۔افغانستان،عراق ،یمن، شام کے پاسپورٹ بدترین قرار دیےگئے ہیں جبکہ پاکستان191،بنگلہ دیش 177 اور بھارت 164 نمبر پر ہے۔
بین الاقوامی ویب سائٹ کے مطابق ایک گلوبل کنسلٹنگ فرم نومیڈ کیپٹلسٹ نے سال 2021 کے بہترین پاسپورٹس کی فہرست جاری کی ہے، اس فہرست میں 199 پاسپورٹس کی درجہ بندی کی گئی ہے۔
اس فہرست میں متحدہ عرب امارات کے پاسپورٹ کو عرب ممالک میں بہترین پاسپورٹ قرار دیا گیا ہے۔فہرست میں کویت، قطر، عمان اور بحرین کے پاسپورٹس کو بالترتیب عرب دنیا کا دوسرا، تیسرا، چوتھا اور پانچواں بہترین پاسپورٹ قرار دیا گیا ہے۔
بین الاقوامی طور پر امارات، کویت، قطر، عمان اور بحرین کے پاسپورٹس بالترتیب 38 ویں، 97 ویں، 98 ویں، 103 ویں اور 105 ویں درجے پر ہیں،اس فہرست میں دنیا کا سب سے بہترین پاسپورٹ لکسمبرگ کے پاسپورٹ کو قرار دیا گیا ہے۔
سوئیڈن، آئرلینڈ، سوئٹزر لینڈ اور بیلجیئم کے پاسپورٹس بالترتیب دوسرے، تیسرے، چوتھے اور پانچویں بہترین پاسپورٹس قرار دیے گئے۔ فن لینڈ چھٹے ، پرتگال ساتویں، نیدر لینڈ آٹھویں ،سنگاپور نویں اور چیک ری پبلک دسویں نمبر پر ہے۔ اس درجہ بندی کے لیے جو پیمانے استعمال کیے گئے ان میں مذکورہ ممالک کے شہریوں کے ویزا فری سفر، ٹیکس قوانین، ترقی، دہری شہریت کے قوانین اور سماجی حالات کا جائزہ شامل ہیں۔
فہرست میں بدترین پاسپورٹس میں افغانستان پہلے ، عراق دوسرے ، یمن تیسرے ، شام چھوتے ، اریٹیریا پانچویں، لیبیا چھٹے ، صومالیہ ساتویں، شمالی کوریا آٹھویں، پاکستان نویں اور سوڈان دسویں نمبر پر ہے۔
