اسلام آباد: وزیراعظم عمران خان نے کہا پاکستان کے اندر بھارتی ریاستی دہشتگردی کے ناقابل تردید ثبوت ہم نے دے دیئے ہیں اور اب دنیا ہمارے دیئے ہوئے ان ثبوتوں پر خاموش نہیں بیٹھ سکتی۔
عمران خان نے سماجی رابطے کی ویب سائٹ ٹوئٹر پر اپنے پیغام میں کہا کہ ان شواہد کے بعد پاکستان اب پرامید ہے کہ عالمی برادری بھارت پر دباو ڈالے گی تاکہ بھارت پاکستان کے امن کو خراب کرنے سے باز آ جائے۔
14d63b24d439bce5c7dc2a65b2a07f7c
انہوں نے مزید کہا کہ عالمی برادری پاکستان میں ہزاروں بے گناہوں کے قاتلوں کو سزا دینے کے لئے دباو بڑھائے گی کیونکہ بھارت پاکستان کے اندر ریاستی دہشتگردی میں ملوث ہے۔
عمران خان نے اپنی ٹویٹ میں لکھا کہ بھارت براہ راست پاکستان میں دہشتگردوں کو مالیاتی اور دیگر سپورٹ فراہم کر رہا ہے تاہم ہماری بہادر سیکیورٹی ایجنسیز اور فورسز عوام کا تحفظ جاری رکھیں گے اور کسی کو شک نہیں ہونا چاہیئے کہ ہم اپنے ملک کا دفاع کرنا جانتے ہیں کیونکہ مشترکہ عزم ہے کہ ملک کا دفاع جاری رکھیں گے۔
واضح رہے کہ آج پاک فوج کے ترجمان میجر جنرل بابر افتخار نے پریس کانفرنس کرتے ہوئے بھارت کے مکروہ چہرے کو بے نقاب کر دیا تھا اور بتایا کہ بھارت خطے میں دہشت گردوں کا سب سے بڑا سہولت کار ہے اور دہشت گرد تنظیموں کو اسلحہ، تربیت اور پیسہ دے رہا ہے۔ ڈی جی آئی ایس پی آر نے بتایا کہ بھارتی خفیہ اداروں نے الطاف حسین گروپ کو 3.23 ملین ڈالر کی رقم دی تھی جس کے شواہد بھی موجود ہیں۔
ان کا مزید کہنا تھا کہ سی پیک کو نقصان پہنچانے کیلئے بھارت خصوصی ملیشیا قائم کی تھی اور 60 ملین ڈالرز بھی ان کو دیئے جبکہ پاکستان اسٹاک ایکسچینج حملے میں بھارتی ساختہ اسلحہ استعمال ہوا۔ اس کے علاوہ بی ایل ایف، پی ایل اے پرل کانٹینٹل حملے میں ملوث تھے اور جس کا ماسٹر مائنڈ بھی بھارت کی خفیہ ایجنسی را کا آفیسر انوراف سنگھ تھا۔
