گیانا : پاکستانی کرکٹ ٹیم کے لیفٹ آرم میڈیم فاسٹ باولر سہیل تنویر 300ٹونٹی ٹونٹی وکٹیں لینے والے باو لرز کی فہرست میں شامل ہوگئے ہیں ،ان کے ٹونٹی ٹونٹی شکاروں کی تعداد اب 301ہوچکی ہے اور وہ یہ اعزاز اپنے نام کرنے والے محض چھٹے باولر ہیں۔
33سالہ سہیل تنویر نے یہ اعزاز کیریبئن پریمیئر لیگ 2018ءکے پہلے کوالیفائر میں گیانا ایما زون واریئرز کی جانب سے کھیلتے ہوئے ٹرنباگو نائٹ رائیڈرز کے خلاف اپنے نام کیا ،گیانا نیشنل کرکٹ سٹیڈیم میں کھیلے گئے اس میچ میں انہوں نے میچ میں 2وکٹیں لے کر اپنے 300ٹونٹی ٹونٹی شکار مکمل کرنے کے ساتھ ساتھ اپنی ٹیم کی جانب سے 20ویں اوور کی پانچویں گیند پر چھکا رسید کرکے گیانا ایمازون وارئیرز کی ٹیم کو فائنل میں پہنچانے میں بھی کلیدی کردار ادا کیا ،انہوں نے اب تک کیریبئن پریمیئر لیگ میں 10میچز میں 25کی اوسط سے 12وکٹیں حاصل کی ہیں ۔
سہیل تنویر کے علاوہ قومی کرکٹ کے سابق کپتان شاہد آفریدی واحد پاکستانی باو لر ہیں جنہوں نے 300ٹونٹی ٹونٹی شکار کررکھے ہیں ،اس فارمیٹ میں 300ٹونٹی ٹونٹی وکٹوںکا سنگ میل عبور کرنے والے کھلاڑیوں میں ویسٹ انڈیز کے ڈووین براوو 445شکاروں کے ساتھ سر فہرست ہیں ، سری لنکن فاسٹ باولر لاستھ مالنگا 351وکٹوں کے ساتھ دوسرے ، ویسٹ انڈین سپنر سنیل نارائن 339وکٹوں کے ساتھ تیسرے ، بنگلہ دیش کے لیفٹ آرم سپنر شکیب الحسن313شکار کرکے چوتھے جب کہ پاکستان کے شاہد آفریدی اور سہیل تنویر301،301وکٹوں کے ساتھ پانچویں اور چھٹے نمبر پر موجود ہیں ۔
واضح رہے کہ سہیل تنویر اس وقت دنیابھر کی ٹی ٹونٹی لیگز میں کھیل رہے ہیں اور بالخصوص کیریبئن پریمیئر لیگ اور بنگلہ دیش پریمیئر لیگ میں ان کی خاصی ڈیمانڈ ہے ،سہیل تنویر نے انڈین پریمیئر لیگ کے پہلے سیز ن میں شرکت کی تھی جہاں ا ن کی راجستھان رائلز کی جانب سے چنائی سپر کنگز کے خلاف14رنز کے عوض6وکٹوں کی پرفارمنس اب بھی ایونٹ کا تاریخ کا ریکارڈ ہے۔
