خدمت خلق فاؤنڈیشن کے ذریعے رقوم برطانیہ بھجواتا رہا، کیف الوریٰ کا اعتراف

کراچی: متحدہ قومی موومنٹ (ایم کیو ایم) کے فلاحی ادارے خدمت خلق فانڈیشن (کے کے ایف) کے ذریعے رقوم برطانیہ بھیجنے کا انکشاف ہوا ہے۔ وفاقی تحقیقاتی ادارے (ایف آئی اے) ذرائع کے مطابق پوچھ گچھ کے دوران ایم کیو ایم رہنما کیف الوریٰ نے رقوم برطانیہ بھیجنے کا اعتراف بھی کر لیا ہے۔ یاد رہے ایف آئی اے 2014-15ء میں ایک ارب روپے سے زائد کی منی لانڈرنگ کی تحقیقات کر رہا ہے ۔

ایف آئی اے نے متحدہ کے 10 رہنماؤں بشمول احمد شاہد، محمد زبیر، ڈاکٹر صغیر احمد، محمد طاہر، منظور احمد، کفیل واڑہ، رؤف مغل، کمال صدیقی، رفیق راجپوت اور محمد عمران کو 15 فروری کو طلب کر رکھا ہے۔

ذرائع کے مطابق طلب کیے گئے رہنما پیسے جمع کر کے خدمت خلق فاؤنڈیشن کے اکاؤنٹ میں پیسے جمع کرایا کرتے تھے جنہیں لندن بھجوایا جاتا تھا۔ ایف آئی اے کو شبہ ہے کہ یہ 10 رہنما بھتے لیکر اور چائنا کٹنگ کر کے پیسہ اکٹھا کرتے اور خدمت خلق فاؤنڈیشن کے اکائونٹس کے ذریعے برطانیہ بھیجتے رہے۔

ذرائع کے مطابق ایم کیو ایم رہنماؤں سے یہ پوچھا جائیگا کہ پیسے کیسے اور کہاں سے اکٹھے کرتے تھے، پیسے کون فراہم کرتا تھا، پیسے لندن بھیجے جاتے تو معاونت کون کرتا تھا اور سب سے بڑھ کر پیسوں کا استعمال کیسے کیا تھا۔ ایم کیو ایم کے سربراہ اور خدمت خلق فاؤنڈیشن کیخلاف منی لانڈرنگ کا مقدمہ 2017ء میں کراچی میں درج کیا گیا تھا مگر بعد میں اسے ایف آئی اے انسداد دہشت گردی ونگ اسلام آباد میں منتقل کر دیا گیا تھا۔

خیال رہے کہ گزشتہ دنوں اسلام آباد کی انسداد دہشت گردی عدالت نے عمران فاروق قتل کیس میں بانی متحدہ قومی موومنٹ کو برطانوی اخبار میں شائع نوٹس کے ذریعے 30 روز میں عدالت میں پیش ہونے کا کہا تھا۔

نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں