مریم کی چیئرمین پی پی کو ملاقات کی دعوت، بلاول کل رائیونڈ جائیں گے

مریم کی چیئرمین پی پی کو ملاقات کی دعوت، بلاول کل رائیونڈ جائیں گے
بلاول بھٹو زرداری اتوار کی دوپہر رائیونڈ میں مریم نواز سے ملاقات کریں گے۔۔۔۔۔فوٹو/ ن لیگ فیس بُک پیج

لاہور: مسلم لیگ (ن) کی رہنما مریم نواز نے چیئرمین پیپلز پارٹی بلاول بھٹو زرداری کو اتوار کو ملاقات کی دعوت دی ہے۔مسلم لیگ (ن) کی ترجمان نے بتایا چیئرمین پیپلز پارٹی بلاول بھٹو زرداری اتوار کو مریم نواز سے ملاقات کریں گے۔ ملاقات کی دعوت مریم نواز کی جانب سے دی گئی۔ جس کے تحت بلاول بھٹو زرداری اتوار کی دوپہر رائیونڈ میں مریم نواز سے ملاقات کریں گے۔


بلاول بھٹو زرداری اور مریم نواز کے درمیان ہونے والی ملاقات میں ان کے قریبی سیاسی رفقا بھی شریک ہوں گے۔ ملاقات میں دونوں جماعتوں کی اعلیٰ ترین سیاسی قیادت کی گرفتاری، ملک کی موجودہ معاشی صورت حال اور حکومت کے خلاف احتجاج کے حوالے سے مشترکہ لائحہ عمل کی تشکیل پر بات ہو گی۔

خیال رہے کہ بلاول بھٹو زرداری نے رمضان المبارک میں اپوزیشن جماعتوں کی قیادت کو دعوت افطار پر مدعو کیا تھا جس میں مریم نواز بھی شریک ہوئی تھیں۔ دونوں سیاسی رہنماؤں کے درمیان پہلی باضابطہ سیاسی ملاقات تھی۔