نیوزی لینڈ، مساجد میں فائرنگ،40 افراد شہید، بنگلہ دیشی کرکٹ ٹیم محفوظ

نیوزی لینڈ، مساجد میں فائرنگ،40 افراد شہید، بنگلہ دیشی کرکٹ ٹیم محفوظ
مسجد میں نماز جمعہ کے وقت مسلح شخص داخل ہوا اور خود کار ہتھیار سے اندھا دھند فائرنگ شروع کر دی۔۔۔۔۔۔فوٹو/ بشکریہ اے پی

کرائسٹ چرچ: نیوزی لینڈ میں دو مسجد پر فائرنگ کے واقعے میں 40 افراد شہید اور متعدد زخمی ہو گئے۔ مسجد میں موجود بنگلہ دیشی کرکٹ ٹیم کے کھلاڑی محفوظ رہے۔


غیر ملکی خبر ایجنسی کے مطابق کرائسٹ چرچ کی ایک مسجد میں نماز جمعہ کے وقت مسلح شخص داخل ہوا اور خود کار ہتھیار سے اندھا دھند فائرنگ شروع کر دی جس سے مسجد میں موجود 40 افراد شہید ہو گئے۔

میڈیا رپورٹس کے مطابق مسجد میں بنگلہ دیشی کرکٹ ٹیم کے کچھ کھلاڑی بھی موجود تھے جو اس واقعے میں محفوظ رہے۔

بنگلہ دیشی اوپنر تمیم اقبال نے اس واقعے کے فوری بعد سوشل میڈیا پر ایک پیغام میں کہا کہ فائرنگ کے افسوسناک واقعے میں خوش قسمتی سے ہم تمام کھلاڑی محفوظ رہے۔ انہوں نے اپنے مداحوں سے دعاؤں کی درخواست بھی کی۔

دوسری جانب ایک اور بنگلہ دیشی کھلاڑی مشفق الرحیم نے اپنے ٹوئٹر اکاؤنٹ پر بتایا کہ کرائسٹ چرچ کی مسجد میں پیش آئے فائرنگ کے دلخراش واقعے میں خوش قسمتی سے ہم تمام کھلاڑی محفوظ رہے۔ انہوں نے کہا کہ اللہ ہم سب کی حفاظت فرمائے اور آئندہ کبھی ایسی صورتحال کا دوبارہ سامنا نہ ہو۔ ساتھ ہی انہوں نے عوام سے دعا کی اپیل بھی کی۔

عینی شاہدین کا کہنا ہے کہ فائرنگ کے واقعے میں متعدد افراد کو گولیاں لگی ہیں جن کی حالت تشویشناک بتائی جاتی ہے۔