بنگلہ دیش کے تمیم اقبال انجری کے سبب ایونٹ سے باہر

بنگلہ دیش کے تمیم اقبال انجری کے سبب ایونٹ سے باہر
فوٹو بشکریہ آئی سی سی آفیشل ٹوئٹر

ابو ظبہی : ایشیا کپ کے افتتاحی میچ میں ہی بنگلہ دیش کی ٹیم کو بڑا دھچکا لگا ہے اور اوپننگ بلے باز تمیم اقبال کلائی کی انجری کے سبب ایونٹ سے باہر ہو گئے ہیں۔سری لنکا کے خلاف دبئی میں کھیلے جا رہے میچ کے دوسرے ہی اوور میں تمیم اقبال نے سورنگا لکمل کی گیند کو پُل کرنے کی کوشش کی لیکن ناکام رہے اور گیند سیدھی ان کی کلائی پر جا لگی۔


تین گیندوں پر 2 رنز بنانے والے بلے باز نے فوری طور پر فزیوتھراپسٹ کی جانب اشارہ کیا اور انہیں میدان سے باہر لے جا کر ہسپتال منتقل کردیا گیا۔

ہسپتال میں کیے گئے ایکسرے کے دوران ان کی الٹی کلائی کے ساتھ ساتھ شہادت کی انگلی میں فریکچر کی نشاندہی ہوئی اور وہ آئندہ 6 ہفتوں تک کرکٹ کے میدانوں سے دور رہیں گے۔

اوپننگ بلے باز کل واپس بنگلہ دیش چلے جائیں گے اور ان کی جگہ متبادل بلے باز نظم الحسین شانتو کو افغانستان کے خلاف میچ میں کھلائے جانے کا امکان ہے حالانکہ ان دنوں وہ بھی انگلی کی انجری کا شکار ہیں۔

یاد رہے کہ بنگلہ دیشی آل راؤنڈر شکیب الحسن پہلے سے انجری کا شکار ہیں اور انہوں نے خود کہا تھا کہ وہ صرف 20سے 30فیصد تک فٹ ہیں اور اب تمیم کی انجری سے بنگلہ دیش کے مسائل میں مزید اضافہ ہو گیا ہے۔