تاشقند: وزیراعظم شہباز شریف 2 روزہ دورے پر ازبکستان کے شہر سمرقند پہنچ گئے ہیں جہاں وہ شنگھائی تعاون تنظیم (ایس سی او) کے سربراہ اجلاس میں شرکت کریں گے۔
تفصیلات کے مطابق وزیر اعظم شہباز شریف شنگھائی تعاون تنظیم (ایس سی او) کی کونسل آف ہیڈز آف سٹیٹ کے اجلاس کیلئے سمرقند پہنچے جہاں انہیں ائیرپورٹ سے حضرت خضر کمپلیکس لے جایا گیا۔
ذرائع کے مطابق وزیراعظم اپنے دورہ ازبکستان کے دوران شنگھائی تعاون تنظیم کے سربراہ اجلاس میں شرکت اور اہم ملاقاتیں کریں گے جبکہ مسجد خضر اور اسلام کریموف کے مزار پر بھی جائیں گے۔
وزیراعظم شہباز شریف تاجکستان، ازبکستان، ایران، بیلاروس اور کرغزستان کے صدور سے علیحدہ علیحدہ جبکہ روس کے صدر ولادی میر پیوٹن سے بھی ملاقات کریں گے۔
مزید برآں شہباز شریف ازبک صدر کی طرف سے سربراہان ممالک کے اعزاز میں دئیے گئے عشائیے میں بھی شریک ہوں گے جس کے بعد ترک صدر اردوان سے بھی ملاقات کریں گے۔
