شازیہ مری کا خواتین کیلئے کھڑے نہ ہونے پر اسپیکر قومی اسمبلی سے شکوہ

شازیہ مری کا خواتین کیلئے کھڑے نہ ہونے پر اسپیکر قومی اسمبلی سے شکوہ

شازیہ مری نے اسد قیصر سے شکوے میں یہ بھی کہا کہ \'تمام ارکان برابر ہیں\'۔۔۔۔فوٹو/ شیری رحمان آفیشل ٹوئٹر اکاؤنٹ

اسلام آباد: قومی اسمبلی میں ڈپٹی اسپیکر کے انتخاب کے دوران شازیہ مری نے خواتین کے احترام میں کھڑے نہ ہونے پر نومنتخب اسپیکر اسد قیصر سے شکوہ کر دیا۔

 

پیپلز پارٹی کی رہنما شازیہ مری نے اسد قیصر سے کہا کہ ' ووٹ ڈالنے آنے والے مرد ارکان سے آپ کھڑے ہو کر مل رہے ہیں لیکن خواتین اراکین کے لیے آپ اپنی نشست سے نہیں اٹھ رہے۔

 

شازیہ مری نے اسد قیصر سے شکوے میں یہ بھی کہا کہ 'تمام ارکان برابر ہیں'۔

 

اس حوالے سے پاکستان پیپلز پارٹی کی سینیٹر شیری رحمان نے بھی ٹوئٹر پر احتجاج کیا اور نومنتخب اسپیکر کے مرد ارکان سے ملنے کی تصویر پوسٹ کرتے ہوئے لکھا کہ 'نومنتخب اسپیکر صرف مرد ارکان اسمبلی کے لیے نشست سے اٹھ رہے ہیں خواتین اراکان اسمبلی کے لیے اسپیکر اپنی نشست سے نہیں اٹھ رہے۔ کیا یہ ہے نیا پاکستان؟۔

 

اس معاملے پر اسپیکر قومی اسمبلی اسد قیصر نے وضاحت جاری کی ہے۔ ان کا کہنا ہے کہ 'میں خواتین کا سب سے زیادہ احترام کرتا ہوں اور ایوان سب کے ساتھ مل کر چلاؤں گا'۔

 

شازیہ مری کی نشاندہی پر اسپیکر اسد قیصر ووٹ ڈالنے والی خواتین ارکان کے لیے بھی کھڑا ہونا شروع ہو گئے۔

نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں