موٹروے پر آئل ٹینکر اور بس میں تصادم، 20 افراد جاں بحق

موٹروے پر آئل ٹینکر اور بس میں تصادم، 20 افراد جاں بحق

کراچی: موٹروے ایم 5 پر بہاولپور کے قریب لاہور سے کراچی آنے والی سلیپر بس اور ٹینکر میں تصادم کے نتیجے میں کم از کم 20 افراد جاں بحق اور 6 زخمی ہو گئے۔ 

تفصیلات کے مطابق موٹروے حکام کے مطابق ملتان، سکھر موٹروے پر ڈائیوو سلیپر بس تیز رفتاری کے دوران ایک آئل ٹینکر سے ٹکرا گئی جس کے نتیجے میں آئل ٹینکر اور بس کو آگ لگ گئی۔

موٹروے حکام کا کہنا ہے کہ حادثے کے نتیجے میں کم از کم 20 افراد جاں بحق اور 6 افراد زخمی ہوئے جبکہ حادثے کے مقام پر موٹروے ایم 5 کئی گھنٹے ٹریفک کیلئے بند رہی۔ 

حادثے کی اطلاع ملتے ہی موٹروے پولیس کے افسران فوری موقع پر پہنچ گئے جبکہ مقامی پولیس اور ریسکیو 1122 کی ٹیمیں بھی موقع پر موجود تھیں۔ 

ترجمان موٹروے کے مطابق جلتی ہوئی گاڑیوں سے بیشتر مسافروں کو زندہ نکالا گیا اور انہیں فوری طور پر قریبی ہسپتالوں میں منتقل کیا گیا جبکہ امدادی ٹیموں کو آگ بجھانے میں کئی گھنٹے لگے۔

 ترجمان کے مطابق آئی جی خالد محمود کی ہدایات پر موٹروے پولیس نے ایمرجنسی کرائسسز سینٹر بنا دیا ہے، موٹروے پولیس نے جلتی بس سے 9 مسافروں کو باحفاظت نکال لیا تھا جبکہ پولیس نے لاشوں اور زخمیوں کو ہسپتال پہنچایا۔ 

ذرائع کا کہنا ہے کہ حادثے کا شکار ہونے والی بس ڈائیوو کمپنی کے تحت چلتی تھی جو گزشتہ رات 9 بجے لاہور سے کراچی کیلئے روانہ ہوئی اور اس میں 2 ڈرائیور سوار تھے جبکہ تمام سٹاف نے سکھر میں تبدیل ہونا تھا۔ 

ذرائع کے مطابق بس میں کل 24 مسافر سوار تھے جن میں سے دو مسافروں نے حیدرآباد اترنا تھا جبکہ 22 مسافروں نے کراچی جانا تھا اور مقامی انتظامیہ کا کہنا ہے کہ حادثے میں کم از کم 20 افراد جاں بحق ہو گئے ہیں۔

مصنف کے بارے میں