اسلام آباد: وفاقی وزیر اطلاعات شبلی فراز نے کہا ہے کہ اپوزیشن نے جگہ بھرنے کے لیے آدھے اسٹیڈیم کو اسٹیج بنا دیا ہے۔
سینیٹ میں اظہار خیال کرتے ہوئے شبلی فراز کا کہنا تھا کہ آج نو جماعتوں کے لوگ عمران خان کے پیچھے لگے ہوئے ہیں۔انہوں نے کہا کہ اپوزیشن کی تقاریر سے یہ تاثر دیا جا رہا تھا کہ جیسے اپوزیشن خود کبھی حکومت میں رہی ہی نہیں۔
وفاقی وزیر اطلاعات شبلی فراز کا کہنا تھا کہ عمران خان نے ان کی پارٹنر شپ توڑی تو ان کو ووٹ کو عزت دو اور جمہوریت کا خیال آیا۔دوسری جانب پاکستان ڈیموکریٹک مومنٹ(پی ڈی ایم) کا پہلا جلسہ آج گوجرانوالہ میں ہوگا جس کی تمام تیاریاں مکمل کرلی گئی ہیں۔
مولانا فضل الرحمان نے پی ڈی ایم کی قیادت کے ساتھ پلان فائنل کرلیا۔ حزب اختلاف کا کہنا ہےکارکنوں کو روکا گیا تو حالات خراب ہونے کی ذمہ دار حکومت ہوگی۔
ن لیگ کی نائب صدرمریم نواز اور پی ڈی ایم کے سربراہ مولانا فضل الرحمان قافلوں کے ہمراہ گوجرانوالہ پہنچیں گے۔ پیپلزپارٹی کے چیئرمین بلاول بھٹو زرداری لالہ موسیٰ سے ریلی کے ساتھ جلسہ گاہ پہنچیں گے۔
جاتی امرا کے باہر ن لیگی کارکنوں کی بڑی تعداد پہنچنا شروع ہوگئی ہے اور بکروں کا صدقہ بھی دیا گیا ہے۔جلسہ دوپہر تین بجے شروع ہوگا اور رات بارہ بجے تک اسے ختم کرنا ہوگا۔
گوجرانوالہ کے جناح اسٹیڈیم میں پی ڈی ایم کی قیادت کیلئے80 فٹ لمبا 24 فٹ چوڑا اسٹیج تیار کیا گیا ہے۔ جناح اسٹیڈیم 6 ایکڑ پر محیط ہے اور اس میں 35 ہزار افراد کی گنجائش ہے۔
